La konferensya de Binyamin Netanyahu en la ONU

Segun lo ke dize la prensa estranjera ke se baza eya mizma sovre varyas eskritas de la prensa Israelyana, el puevlo Israelyano i kon por seguro todos los djudyos de la Diaspora, resyenten un profundo sentimyento de trankilidad i konforto despues la konferensya ke Netanyahu dyo en la ONU, un diskorso ke alesha por el momento la perspektiva de un atako sorpreza de la parte de Israel kontra el Iran.

Klara PERAHYA Judeo-Espanyol
3 Ekim 2012 Çarşamba

El korespondyente en Yerushalayim de una de las grandes gazetas fransezas dize:

“El diskorso de Netanyahu al seno de la ONU trankilizo paradoksalmente la opinyon Israelyana.”

Todo en eksplikando ke el Iran puedra ser en mezura desde el enverano del anyo 2013, de empesar la konstruksyon de una bomba atomika, el primer Ministro Israelyano fikso kon  una linya kolorada la ekstrema limite ke el respektara, i ansi  alesho por el momento la perspektiva de un atako sorpreza ke puedia okazyonar una situasyon trajika.

De su parte, ‘Ron Ben-Yishai’ espesyalisto de kestyones de la defensya, dize  tekstualmente en el diaryo  Yedioth Ahronoth, “Se puede deduzir ke los riskos ke Israel empese un golpe preventivo kontra el Iran en un futuro serkano se amenguaron muncho; en todo kavzo no sera antes las eleksyones Amerikanas ni probavlemente durante este invyerno”

Komo disho un otro gazetero, el diskorso de Binyamin Netanyahu en la Sala de la ONU, el 27 Septembre 2012, fue un diskorso de paz, un doskorso historiko.

Debasho estas linyas, vos do el empesijo de la dicha konferensya:

Sinyoras i Sinyores

Israel tendyo la mana a la Paz desde el momento ande el fue kreado, ay de esto 63 anyos.

Al nombre de İsrael i del puevlo djudyo, oy de mezmo ofreso la mano a los puevlos de Ayifto i de Jordania, a los kualos renovo muestra amistad por vezinos kon los kualos ya izimos la paz.

Ofreso esta mizma mano al puevlo de Turkia kon respekto i buena voluntad.

İ de mezmo a los Libyanos i Tunizyanos, kon el dezeo por estos puevlos ke se fruagen un futuro demokratiko.

La ofreso tambyen a los otros puevlos de Afrika i de la peninsula Arabika kon loskualos dezeamos un muevo empesijo.

La ofreso a los puevlos del Liban, de la Siria i del Iran, ke todos tyenen el koraje de luchar kontra una represyon brutal.

Ma mas espesifikamente, ofreso mi mano a los Palestinyanos kon los kualos bushkamos una paz djusta i final.ets…ets…”.

Ansi avlo el Shefe del Governo Israelyano Benyamin Netanyahu…

En este momento keridos lektores,mos topamos en una epoka de fyestas relijyozas. Despues de Teshabeav en los dias kayentes del enverano, tuvimos Rosh a shana, prinsipyo del anyo, dias ande Ezra meldo delantre el puevlo las leyes a sigir, i ansi profunda meditasyon de kada ombre. Kipur dia de arrepentimyento i de perdonansya i enfin “Sukkot fyesta de las kabanas i de las tyendas, dias kon Simha Torah de rengrasyamyento al Dyo por todo lo ke mos da, dias de esperansa ande la refleksyon i la aksyon kaminan i kaminaran syempre endjunto mano kon mano.

Ansi sera syempre para Israel i todo el puevlo djudyo ande ke se tope. “Syempre la serenidad i la trankilidad despues el espanto i el desmamparo, syempre la alegria i la seguridad despues la dolor i el dubyo.