Es ke Kipur es un dia de perdonansa? lo espero de alma i korason ...Ma antes de todo, el es un dia de arrepentimyento i de meditasyon, espesyalmente en estos anyos ande el mundo (en kaji su totalidad) se topa en un djenero de kaos inekstrikavle ande las valores las mas altas paresen aver pedrido sus senso, ande preseptos etikos son violados en favor de otros ke paresen mas provechozos i ande tambyen razones falsas son munchas vezes empleadas para motivar i djustifikar ‘el menospresyo’ o ‘la vengansa’.
Kipur es un dia ande sentimos ke mos topamos delantre una Fuersa Superyor lakuala mos ovliga a ser sinseros i a respektar muestros semblavles, porke eyos tambyen son kriansas del Dyo komo lo semos mozotros.
Kipur mos ovliga a djuzgarmos de mozotros para mozotros en la desnudez(çıplaklık) de muestro ser real... El deve antes de todo ser un dia de verdad facha a facha kon muestros kontemporeanos ken ke sean.
Kuando semos de idea kontrarya a lo ke eyos dizen o azen, les daremos simplemente muestra opinyon en propozandoles argumentos plozivles segun las kondisyones ande eyos se topan ...Esto es no solo muestro derecho el mas lejitimo ,ma tambyen muestro dover el mas imperyozo.
Kipur es un dia ande devemos akseptar ke ‘Ninguno es superyor al otro’, el deve ser kompuesto no solo de orasyones i kontrisyones ma tambyen de esforso de avenimyento... No mos olvidaremos ke semos todos iguales delantre el Dyo, kada uno kon su propya ‘manera de ser’ a kondisyon de nunka danyar, molestar ni ferir fizikamente o moralmente.
No azeremos de la vida una esfera de pleto ni de simple voluntad de dominasyon , ma de bushkida de komprensyon i de egzistensya konsagrada a ’la ermandad ’, un dia dedikado a ‘la bushkidad de lo ke mos auna i no de lo ke mos desferensya los uno de los otros’ .
Albert Einstein avia dicho: “Solo un lavoro komun ke sera el objetivo prinsipal de todos los djudyos del mundo, asegurara la salud de este puevlo . La grandor de Herzl konsiste a aver sido el primer a rekoneser esta verdad. Se trata de un nasyonalizmo ke no bushka el poder ma la dinyidad”.
İ de su parte, Josué Jehouda avia echo esta reflekson:” No se puede despartir arbitraryamente(keyfi olarak) las dos aspirasyones fundamentales de la alma djudia: ’el nasyonalizmo i el universalizmo.
Todos savemos (komo disho el Eklesyasto) ke ay un tyempo para kada koza: ‘un tyempo para la gerra i un tyempo para la paz’, ‘un tyempo para la intransijensya i un tyempo para la toleransya’ i ansi va el orden de la vida, envezes refuzar i envezes akseptar,... kritikar si es imperativamente nesesaryo, ma ‘nunka arrebashar’. ’La burla’ es el kastigo el mas inyovle i el mas krual de todos los kastigos inflijidos a una persona, eya la arrebasha en su grandor de ‘ser pensante’.
ORAS DE ORASYON DE SUKOT
30 Eylül Alhad
Primer noche
Minha Arvit: 18.30
1 Ekim Lunes
Primer diya
Tefila: 08.00
Segundo noche
Minha Arvit: 18.30
2 Ekim Martes
Segunda diya
Tefila: 08.00
Minha Arvit: 18.40
Motsae Yomtov: 19.18
