No mos apresuraremos a djuzgar i kritikar

Sin por esto kedar indiferentes, no mos apresuraremos a kritikar kualkyer desizyon ke mos parese ser negativa... las konsekuensas pueden ser graves i envezes irreversivles. Desharemos al tyempo la oportunidad de aklarar las razones de un proyekto ke mos desplaze antes de kondenar un rezultado ipotetiko ainda imprevizivle.

Klara PERAHYA Judeo-Espanyol
5 Eylül 2012 Çarşamba

En varyos kavzos el ‘silensyo delantre lo ke a primera vista  parese ser un yerro’, es una prova de ‘madurez’ i de ‘refleksyon’.

Komo ya lo meldimos todos en la Prensa Internasyonal, djuevez el 30 del mez pasado uvo en İran la konferensya de los payizes ‘no alineados’.

Kon la esperansa de provar al universo entero i espesyalmente a sus propyos opozantes  ke sus payis  no es  aizlado, el prezidente Mahmud Ahmedinecad se apresuro a kombidar al dicho kongreso ‘el aktual Sekretaryo jeneral de la ONU Ban Ki-moon’ i ‘el primer Ministro de Ayifto Muhamed Mursi’, loskualos akseptaron sin ezitasyon la invitasyon.

Algunos kritikadores oksidentales no mankaron de kondenar esta akseptasyon immedyata de la parte de Ban Ki-moon, afirmando ke asistir a un semejante kolokyo seria kontraryo al  prestijyo del Shefe de la mas grande İnstitusyon  mundyal.

Los faktos  dyo un desmentido kolosal  a las esperansas de los Ayatolahes Iranyanos komo tambyen a la inkyetud i a las remarkas pesimistas de los kritikadores oksidentales.

Kuando (en el dicho kongreso de los ‘no alineados’) fue su torno de tomar la palavra, despues de aver pronunsyado las formulas adekuadas de kortezia, Ban Ki-moon se apresuro a denunsyar publikamente las amenazas  anti Israelyanas de Teheran. El disho klaramente:

“...las refuzo kon fuersa estas amenazas  pronunsyadas de la parte de un estado myembro del ONU de destruir kualkyer otro payis, komo tambyen refuzo los komentaryos revoltantes nyegando faktos istorikos tal el Holokosto”

‘Afirmar ke Izrael no tyene el derecho de egzistir o prezentar el Estado Ebreo de una manera rasista es no solo inakseptavle, ma mete tambyen en perikolo los prinsipyos de la Grande İnstitusyon Internasyonal  ke es la ONU’ (fin de sitasyon).

En efekto, el Prezidente Iranyano tyene nyegado munchas vezes la Shoah i ainda en un pasado serkano, el kalafiko Israel de “Tumor kanseroza”

Konsernando la kestyon nuklearya, (segun lo ke mos dize la prensa) el ultimo raporto de la Ajensia İnternasyonal de la Enerjia Atomika (AİEA) konfirma ke Teheran esta kontinuando a desvelopar las ‘kapasidades de enrikesimyento de Uranium, violando ansi las rezolusyones del Konsilyo de Seguridad de la ONU.

Este raporto renforso el mensaje de Ban Ki-moon ke profito para egzijir publikamente del İran de respektar las rezolusyones de la grande İnstitusyon mundyal i de no impedir kualkyer invistigasyon a este sujeto.

De su parte, el Primer Ministro de Ayifto Mohamed Morsi (İslamisto moderado salido de los rangos de “Los Ermanos Muzulmanos”) deklaro  en su avla ke ‘la  solidaridad kon el puevlo Siryano kontra un governo de opresyon ke ya pyedro su lejitimidad  es un dover moral  ansi ke una nesesidad politika i estratejika.

El disho tekstualmente lo sigyente:

“Devemos todos ekspresar muestra entera solidaridad  a la lucha de los ke bushkan la libertad i la djustisya en Siriya i traduzir ansi esta simpatia en una vizyon politika klara ke apoyara una tranzisyon pasifika en direksyon de un sistema demokratiko el kual reflektara las demandas del puevlo Siryano” (fin de sitasyon)

En sinyo de protestasyon, la delegasyon Siryana salyo immedyatamente de la sala de konferensya i retorno solo a la fin del diskorso de Mohamed Morsi.

Ansi se paso parsyalmente el Kongreso no muy briyante de los ‘No-alineados’ en İran.

El prezidente Ahmedinecad avia pensado ke la prezensya de ‘Ban Ki-moon’ iva endorar el prestijyo de su partido, ma el rezultado fue negativo i las faltas probavlemente voluntaryas de la traduksyon en arabo del  diskorso del Sekretaryo Jeneral de la ONU destinada al puevlo, agravaron ainda mas la situasyon.

Varyas personass de mentalidad oksidental se avian apresurado en vano a kritikar  la prezensya de ‘Ban Ki-moon’ en este kongreso, ma se yerraron en sus previzyones pesimistas i no ay dubyo ke eyos mizmos seran aktualmente kontentes del rezultado final. 

Los dias avlaran……