(Kendi kendine yalan söylemek)
Alhad ultimo asentada en el balkon en la isla Burgaz; mirando a la mar, las barkas, los vapores, los arvoles, las rozas multikolores pensi de mi para mi:
• Deke las personas no toman plazer de la vida, de la sanedad, en lugar de avlar por uno u por otro de azer komerajes (dedikodu), sin saver lo djusto veramente.
• Deke moz plaze guadrar la verdad en avlando mİntiras.
• La mİntira la mas negra es la mİntira ke la persona avla a si mizmo.
De este punto de vista el konkorente (rakip) de la persona, mismo su enimigo (düşman) es; el propyo (kendisidir).
Por egzempyo kuando mos vamos a una boda, lo ke mos demandan es; komo estava la madre del novyo u de la novya? Ke kolor de fostan teniya?
Es muy emportante!... İ mozotros respondemos, mizmo ke mos plazyo; eeeh no estava negra, ma la kolor estava muy klara en este dia ariskuro del invyerno. Kale ke kritikemos, esto lo tenemos de uzo. No mos plaze nada, kale ke topemos una kozika para avlar.
İ el fostan de la novya? De ande selo merko u ande selo kuzyo? Stephane, u Vakko , u de otro lugar.
Aaah no valiya nada. Aser ke estava muy luzya, ma la mantalitad es ke si no se gasto muncho, u si no es una marka konosida no es ermozo.
Ke mos emporta! Las personas son selozas.
Mizmo ke la organizasyon de la boda fue ekstraordinarya, yene se topa de avlar. Aser ke nada no mos deve de enteresar.
İ las demandas kontinuan. Komo paso la nochada de la boda? Fulaniko estava envitado? Aah, ke pekado!... No yamaron a este amigo? Ke verguensa!...
İ si ez una boda de un merkader u de una personalitad famoza de la komunitad; syertos tyenen el orgolyo de dizir ke estavan envitados.
Syertos se syenten muy emportantes de ser envitados a estas fyestas. Aser ke nada no es emportante mas ke la salud i la kerensya.
La persona deve de konoserse. Kale ke se demande: “Ken so yo, komo devo de ser i komo devo de komportarme kon los otros?”.
El byen kerer al den frente es una kualitad.
Kuando la persona kere byen se apersive ke, i el den frente lo kere byen.
“Las ovras son kerensyas”. Kuando se aze buendades, todo es resivido.
Avlar kontra (“Lashon Ara”) del den frente es grande pekado en muestra relijyon.
No devemos de peryer el tyempo en estas bavajadas. Al kontraryo alavar al evenemento ke se paso. Esto da una grande alegriya a los ke oyen.
Syempre teneremos bodas, i alegrias.
Todo veremos kon ojos pozitivos, i no kritikaremos kualkyer (herhangi) koza….
