Ay sirkunstansyas ande una klemensya eksesiva es portadora (en sus buenas intisyones mizmas) de faltas de djuzgamyento i ansi de un real senso de lo ke es la etika
Komo fue tambyen el kavzo en la prensa internasyonal en su totalidad, el kotidyano elektroniko “Le monde” uno de los mas grandes diaryos de Fransya, eskrivyo lo sigyente:
“Fanatiko super nasyonalisto, kulpavle de dos atentados ke provokaron: (El primer perpetrado el 22/7 del anyo pasado, la muerte de 77 viktimas porke eyas eran de ideolojia sosyalista i unos kuantos dias mas tadre, el segundo ‘ke se supoza ser tambyen suyo, aunke el no puedia ser prezente, porke arrestado’ un shifro de muertos muncho mas chiko) Breivik fue sentensyado a solo 21 anyos de enkarselamyento, el maksimum de penalidad en Norvejya” (fin de sitasyon).
20 anyos de kativeryo a partir de oy por un atentado infame ke kavzo la muerte premeditada de mas de 77 inosentes... Solo 20 anyos por un akto kriminal pensado i aparejado en el kalmo... 20 anyos ke serviran al matador (ke tuvo la ozadia de deklarar avyertamente ke el va reempesar) a desvelopar sus teorias makabras ultra nasyonalistas, empapadas de odyo i a komunikarlas a sus partenaryos ideolojikos.
‘Vente i un anyos’ es el maksimum de penalidad inflijida en Norvejya por kualkyer krimen, ideolojiko o no; ma egziste una eksepsyon aksesorya ke se aplika a la fin del tyempo de enkarselamyento, solo en kavzo ande el kondenado es konsiderado komo danjerozo para la sosyedad (lo ke por seguro va pushar Breivik (rekonosido ‘sano de esprito’) a tener una kondukta irreproshavle todo el tyempo nesesaryo, sin por esto sentirse ovligado de modifikar sus intisyones kriminales.
La mas parte de norvejyanos, aunke perpleksos, paresen kontentes de esta sentensya, lo ke (devo konfesar), no entyendo.
Es ke la muerte de mas de 77 inosentes no es un kavzo eksepsyonal?
Una pedrita terrivle no solo para las famiyas de las viktimas ma tambyen para el payis entero?
Un kastigo djustifikado no es solo portador de una valor punitiva, la kuala es nesesarya i mizmo indispensavle porke anchamente meresida; el es tambyen portador de un egzempyo disuazivo i puede ser de un tema de refleksyon para todos los ke se topan sovre un kamino semejante i tyenen en sus esprito semblavles aspirasyones...
Un kastigo djustifikado inflijado a kualkyer kulpavle puede despertar pensamyentos muncho mas sanos en otros espritos enfokados en ideales falsos.
La alegria del matador al anunsyo del veredikto ke lo konsidero “de esprito perfektamente sano’’ dunke responsavle de sus aktos, prova su orgolyo malsano i muy danjerozo.
El no manifesto a ningun momento el mas chiko sinyo de repentensya o de remorso... i portanto los ke muryeron eran mansevos de su propyo puevlo, kaji de su sangre.
En prizyon, el tendra a su dispozisyon un ordinador(komputer) i probavlemente materyal para eskrivir....sin pueder komunikar kon el eksteryor.
Kuala va ser en su meoyo la madurasyon (olgunlaşma) de su ideal actual i de sus refleksyones? difisil de afirmar kualo ke sea.... ma es ‘aindamas difisil i problematiko’ de pensar ke puedra espuntar kualkyer sentimyento de regreto o de oto-kulpabilizasyon en el.
Al pareser el es konvensido de la djustedad de su ideal rasisto i de su dezeo de “una Noverjya i mizmo de una Evropa integralmente puras de todo modo de elementos ajenos”; el deklaro avyertamente kel
kontinente evropeo kale ke kede integralmente kristyano.
Ke es la sinyifikasyon egzakta de esta manera de pensar ke de dia en dia esta pujando mizmo en los espasyos konsiderados komo muy evoluados?
Durante 20 anyos Breivick va madurar no solo sus refleksyones i prinsipyos, ma tambyen su manera de prezentar i transmeterlos a los otros.
A la epoka de su liberasyon el va tener 54 anyos, la edad ideal para tener la estatura de un kapo de fila i pueder prezentar sus teorias de una manera konvensyente.
Durante 20 anyos el kedara para sus’kamarades de lucha’ ke oy pensan komo el “un djenero de eroe ke tuvo la fuersa de asumir el objetivo de sus ideal ultranasyonalisto”.
No mos olvidaremos ke el ekstremizmo es un estado de aberasyon ande la persona pyedre la posibilidad de djuzgar. Mozotros djudyos ya lo savemos byen i devemos guadrarmos de kualkyer ekseso mizmo si es de aparensya perfektamente pozitiva.
