Alhad pasado demanyana tuve la ermoza okazyon de vijitar una ekspozisyon de pintura ke me prokuro, lo konfirmo, un grande plazer.
Unos kuantos tablos de Robert Baruh yenos de luminozidad, i tambyen unas kuantas pinturas yenas, en sus sinplisidad, de esta sensasyon de serenidad ke devyene muy rara en muestros tyempos.
Los sujetos eran muy simples “el interyor de la Kariye Camisi”, “unos kuantos payizajes”, “yallis en el Bosforo”, “chikos kafes al bodre de la agua”, kon syempre una kualidad partikular de klaredad i mezas entornadas de kuatro o sej siyas ke paresen kombidar los klientes a pasar unas kuantas oras de paz i de verdadero enkontro kon amigos, todo lo ke mos manka en esta epoka loka ande todos koryen detras un ideal imajinaryo, el kual parese perpetualmente kerer eskaparse de sus manos.
Egziste byen entendido pinturas modernas por la mas parte abstraktas, kon una bushkidad insesante de linyas i formas muevas o kon temas filozofikos ke los vijitadores se esforsan de desshifrar... eyas tambyen son por seguro muy interesantes, ma en las de Robert Baruh ay komo una espontaneidad ke establese kaji immedyatamente un kontakto emosyonal entre eyas i los ke las miran.
Alhad pasado demanyana, fue un kuarto de ora muy agradavle kon unos kuantos amigos, delantre tablos ke mirimos largamente kon muncho plazer.
