Esto segura ke munchos lektores van a dezir kon razon: “En kualo mos interesa a mozotros djudyos de Turkia, la eleksyon franseza?”
Realmente no tengo ninguna repuesta konvinkante ke puedra kontentarlos .... ma (kuala ke sea la reaksyon de los ke me meldan) vo dezir ke “en este tyempo de globalizasyon, kualkyer akontesimyento ke okure en ke parte del mundo ke sea, mos toka de leshos o de serka”,
Puede ser tambyen ke esta eleksyon mos interesa porke la komunidad Djudia de Fransya es (si no me yerro) la segunda o byen tresera mas grande komunidad de la Diaspora, leshos byen entendido, despues la Amerikana, i de mezmo “porke, ay de esto mas o menos 130 o 140 anyos, las eskolas Fransezas de la Aliansa trusheron a muestros avuelos la kultura de sus payis”.
No savemos de una manera segura lo ke sera el rezultado del segundo torno, el definitivo, ma se pensa kaji sin el meno dubyo ke sera una konfirmasyon del primer.
No se porke razon, kaji desde los primeros dias, “la ira i la sanya” kontra Nicolas Sarkazy fue enorme i (komo lo afirman grandes analistos i komentadores politikos) esta antipatia kaji viseral kontra el prezidente en partensya, konstitue el motivo prinsipal del rezultado negativo ke el obtuvo.
Esto dicho, komo syempre, mozotros desendyentes de Yehuda, mos demandamos ”eske la konfirmasyon del rezultado de este primer torno elektoral sera desfavoravle al puevlo djudyo?”
Todos konosen el menospresyo kaji viseral ke munchos “sosyalistos de obediensa komunista” resyenten kontra Israel i sus refuzo invariavle de entender la situasyon real de este chiko payis entornado de potensyas enemigas ke demandan su dezaparisyon kompleta.
De sus parte, los grandes ekonomistos se denandan eyos, lo ke seran en esta epoka de terrivle konfusyon ekonomika, las konsekuensas de la governansa de un partido sosyalisto kompuesto de elementos por la mas parte diferentes i mizmo kontraryos los unos a los otros?
Multiples grandes intelektuales i editoryalistos no son en este momento muy optimistos. Unos kuantos dias antes de la primera eleksyon, Jean d’Ormeson, myembro de la Akademia Franseza,autor de multiples livros traduzidos en diferentes linguas, publiko debasho el titulo “Mensaje a los indesizos” una chika eskrita un poko humoristika konsernando lo ke iva ser el rezultado de este primer torno, eskrita de la kuala vos do debasho estas linyas, la traduksyon en djudeo-espanyol de unos kuantos paragrafos:
“La kestyon no es de saver ken ganara la viktorya de Mayo 2012: El anyo pasado todos eran konvensidos ke iva ser Dominique Strauss-Khan, despues, se penso a las Sinyoras “Aubry” i “Le Pen”, puede ser mizmo a François Bayrou o Melenchon.. Ken ke sea, salvo Sarkozy.
Sin dubyo el triunfador sera François Hollande; es verdad, ombre muy apresyavle, intelijente i muy kultivado. El puedria ser un ekselente prezidente en tyempo kalmo i sin nuves ...ma el no es un François Mitterand ni un Jaures o Leon Blum. Su avla es perfekta, su sintaksa tambyen...el puedria tambyen ser un myembro de la Akademia Franseza, ma en ningun kavzo a la kavesa de la Sinkena Republika ,kuando ay espanto de tempesta.
Sarkozy peko por kerer azer mas de lo ke kalia azer, Hollande, el, lo kontraryo.
Si... Es muy posivle ke Hollande sea elijido definitivamente en unos kuantos dias, ma “el” i “la totalidad de los partidos ke van a dirijir kon el” no son syempre de akordo entre eyos, sin mizmo avlar de los partizanos de Melanchon i de Eva Joly de los kualos el tyene absolutamente menester para pueder triunfar, ma de los kualos malorozamente, el programa es fantasmatiko en esta epoka de kriza, komo por egzemplo el fakto de reklamar kon insistensya la “Jubilasyon(emeklilik) a 60 anyos, kuando la lonjevidad esta aumentando de dia en dia” o “engajar (kontratar) 60.000 muevos funksyonaryos kuando oy se trata de amenguar los gastes publikos afin de no krear muevas devdas”...ets..
Por kontra Nicolas Sarkozy, aunke fue el prezidente el mas kritikado , arastado en el lodo i el mas arrebashado entre todos los dirijentes de Fransya, pudo mantener el payis afuera de la agua durante la mas terrivle kriza ekonomika ke konosimos..
Es por esto ke delantre lo ke sera el djuzgamyento de la Historya, oy, yo eskojo el partido mas o menos koherente “Sarkozy-Fillon- Juppé” i no “ Hollande - Aubry- Melanchon- Joly”.
Ansi eskrivyo el afamado vyejo akademisyano. Munchos otros komentadores tambyen, todo en rekonosyendo las inkontestavles kualidades personales del futuro Prezidente, se lamentan sovre la kompozisyon yena de opozisyones de la totalidad de su partido, lo ke puedra impedir una governansa syempre armonyoza.
Los dias avlaran...
