ANTAKYA: es la sivdad de la armoniya entre las relijyones i las komunitades diferentes… i una melodiya ke nase de esta armoniya…
Una sinfoniya! (senfoni) Una orkestra sinfonika ke esta vokalizando (seslendirmek) una poema sinfonika (senfonik şiir). Ay munchos shefes (şef) diferentes en esta orkestra. Uno de eyos es el Presidente de la komunitad djudiya ke es enstalada (yerleşmiş)
Ay 23 syeklos en Antakya: “Saul CENUDİ”.
Persona muy kayente, entimo, ke se aserka fasilamente de las personas, un ombre ke es respektado i amado por todos en Antakya…
Mos resivyo kon mi marido en el salon ke konstruizo ensima de la sinagoga.
El konstruizo este salon kon las donasyones ke arekojyo de la Munisipalidad de Antakya i de diferentes assosyasyones. Un lugar muy otantiko…
Despues ke bevimos los kafes ampesimos a la konversasyon (söyleşi).
Puedes prezentarte?
“Nasi en Hatay. Estudyi en Estambol en el enterval de los anyos 1955-1962. Mi chikes, mi manseves i toda mi vida a parte de los estudyos, paso en Antakya.
Termini el liseo İtalyano. Tengo dos ijas i un ijo. Las dos ijas biven en İsrael i mi ijo esta bivyendo en Estambol.”
Kedo populasyon manseva en Hatay?
“Malorosamente no kedo mansevos. Somos solamente
14 famiyas, 30 personas komo djudyos.
Los solos mansevos son el kuple ke kazimos alhad:
Meri i Samuel Kohen”.
Kualo es la razon de la emigrasyon?
“Los mansevos para estudyar la universitad se estan iyindo a Estambol i se estan kedando aya. Otra razon es ke; los mansevos i las mansevas no estan puedyendo topar kompanyeros (eş) para kazarsen. Esta kavza (sebep) es la mas emportante.
Kuando se estan auzando a la vida de Estambol estan tomando a sus famiyas allado de eyos. İ este modo no esta kedando aki dingunos”.
Kuando fue elijido (seçilmek) komo el presidente de Antakya?
“Me eskojyeron en el anyo 2002 i esto azyendo todo lo ke puedo para el avenir de mi komunitad.
Esto lavorando de alma i de korason para reushir”.
Komo estaj realizando (yerine getirmek) las ovligasyones relijyozas (dini vecibeler)?
“Mi dover prensipal es de mantener de una manera biva, las valores relijyozas de mi sosyetad aktual.
Esto dando un grande esforso (çaba) para esto.
Antes 10-15 anyos, muestra sinagoga estava avyerta los lunes i los cueves ke son los dias de Sefer.
Malorosamente kon la emigrasyon i esto se termino.
Solamente los dias de Shabat estamos puedyendo realizar muestras orasyones.
No tenemos persona relijyoza (din adamı) en Antakya.
Para pueder realizar las ovligasyones relijyozas; antes kuatro anyos kon el apoyo del;
Grande Rabino İsak Haleva i Robert Abudara (ke este en gan-eden) fue nominado (tayin etmek) un kantor (hazan) ke vyene kada vyernes aki, i torna kuando se eskapa Shabat a Estambol.
En el pasado kuando muestros ansetros biviyan en akeya perioda en Antakya; para resivir el dia de Shabat, serravan temprano el lavoro, se ivan a kaza para lavarsen i prepararsen i antes de shabat viniyamos a la sinagoga para orasyonar. Esto vimos de muestros padres.
Dos famiyas menesterozas biviyan en la sinagoga en mi chikes. Estas famiyas aziyan la limpyeza de la sinagoga. Abut MALE (ke este en gan-eden) mos ambezava la relijyon (din dersi). Si estamos puedyendo meldar oy en dia, es grasyas a lo ke mos ambezo en muestra chikes”.
Komo fyestavaj, por egzempyo komo selebraj la fyesta de Pesah?
“Teniyamos un orno aryento de la sinagoga en el lugar ke utilizavamos (kullanmak) komo mupak. Aya aziyamos la Matsa de Pesah komo una pita (pide) muy delgada, se aziya la “Matsa Shemura”.
Dingunos no se iva al lavoro los dias de Shabat, no se suviya a la araba, no avriya la elektrisita, todos miravan al Shabat. Antes de shabat se asendiya las lampas de gaz, i antes de echar los vizinos del doredor viniyan para amatar las lampas.
Despues de la orasyon de shabat todos se ivan a sus kazas, las mujeres saliyan un poko mas presto para pueder aparejar la seuda de shabat.
Preparavan kozas diferentes, muy savrozas i se beviya raki.
Noche de vyernes se asendiya las kandelas de Shabat, se aziya el Kidush kon toda la famiya en el entorno de la meza. Se biviya asigun las tradisyones djudiyas.
Las otras komunitades en Antakya mos deskriviyan (tanımlamak) en esta forma:
Una sosyetad (toplum) ke es atada a su relijyon, onesta, ke se puede kreer a su palavra, korekta, i buen komersante. Eyos mos nombravan de esta manera.
Despues de la Minha, en una guerta en el kampo (kır bahçesi) ke aparteniya a la komunitad, las mujeres se arekojiyan, para aparejar pransos, en las mezas ordenadas, para komer todos endjuntos, despues kantar i kontar konsejikas para pasar el tyempo kon felisidad.
En las fyestas Purim i Hanuka, se dava paras a las kriyaturas para ke se merken lo ke dezeyavan.
El hazan Mordo Razon vyene aki en kada fyesta para realizar las ovligasyones relijyozas menesterozas”.
Se fyestava las Bar-Mitsvas, Brit-Millas, las Vijolas en los tyempos pasados?
“En las Brit-Millas se aparejava una tavla (tepsi), enriva se metiya kandelas, todos metiyan una moneda para Eliyau Anavi a la tavla i esto todo se aziya regalo al rezin nasido (bebek)”.
Komo estaj kompensando (karşılamak) los gastes?
“Abasho del salon para los envitados, tenemos tres magazenes ke los alkilamos”.
Kualos politikos (siyasi) vijitaron Antakya?
“En el anyo 2010 el Prezidente de la Republika Abdullah Gül vijito esta sivdad istorika.
Komo ministros del estado, Bülent Arınç, Ahmet Davutoğlu, Hüseyin Çelik, i Egemen Bağış…
Todos vijitaron la sinagoga para pueder konoser el Djudesmo (Yahudilik) i los Djudyos. Komo bive el djudyo, kualo kome, kualo beve, komo orasyona ampesaron a ambezarsen.
En una fyesta de Pesah; la mujer del Primo Ministro Emine Erdoğan mos vijito.”
Estaj kontentes de la vida en Antakya. Komo puedej eksplikar esta satisfaksyon (memnuniyet)?
“Aki tenemos una vida yena de repozo, i kalmo.
Estamos bivyendo kon armoniya. Antakya es una famiya de 200.000 personas.
Esta salyendo un kontakto (ilişki) maraviyozo de esta armoniya. Tenemos relasyones muy amistozas kon los Musulmanos, Kristyanos, i Djudyos kon todos.
Todos tyenen una kontribusyon (katkı) muy grande.
En las fyestas relijyozas mos vijitamos resiprokamente, unos kon los otros.
Esperamos i estamos rogando ke estas relasyones kontinuen syempre”.
Ay un mesaje ultimo (son) ke kere dar?
“Mi dezeo es: ke la Komunitad Djudiya de Antakya seyga una populasyon kondensada (yoğun nüfus)…
Mi mesaje de alkavo es: Los ke tyenen difikultades ekonomikas ke vengan de Estambol, ke lavoren aki en Antakya.
Les esto prometyendo las mijores kondisyones para topar lavoro, alkilar kaza i para bivir una vida kon plazer i felisidad.
Las personas aki son ospitalyeras (misafirperver), respektuozas i yena de kerensya.
Bivir en esta sivdad es un privilejyo (ayrıcalık).
Vini aki i biviremos todos endjuntos este privilejyo”.
