Antes de pasar al kuento, kero dar syertas informasyones sovre Rashi-Rav Yitzhaki, yamado tambien Rabbi Shlomo Yitzhaki. Nasyo en Troyes, sivdad situada en la rejyon de Champagne i ande paso la mayoriya de su egzistensya. Muryo en 1105 en la mizma sivdad. En el anyo 2005 la Direksyon Postal Franseza kito un timbro a la okazyon del 900. anyo de la muerte de Rashi.
Rav Yitzhaki fue un importante komentator de la Tora i del Talmud. Su komento sovre el Talmud tyene komo baza el arrekojimiento de las bushkidades ke izyeron savyos djudios antes de el. Los inyetos de Rashi, eyos tambien avyeron “Yshivot” en diversas sivdades de Champagne, sentros de estudyos rabinikos, seminaryos ande se estudyava la Tora, el Talmud i sus komentos. Transformaron esta rejyon en un Sentro de Kultura Djudia.
Komo konsekuensa, se formo un grupo de eskrivanos tenyendo la misyon de desvelopar, kritikar, eksplikar i propajar los komentos” TOSAFOT” de Rashi. Es achetado ke uno de los inyetos de Rashi, Rabbenu Tam, Yaakov Ben Meir, fue el mas grande eskrivano de Tosafot. El lektor va topar en las linyas sigientes un epizodyo enteresante de la vida de Rashi…
RASHİ i el PAPAZ:
Rav Shlomo Yitzhaki biviya en Troyes, sivdad en la rejyon de Champagne en Fransiya. En el korso de su viyaje al Oriente kon el eskopo de vijitar las Akademias Djudias, enkontro un papaz. Rashi i el papaz ke estava indo a Yerushalayim en pelegrinaje, tuvyeron un largo momento, una konversasyon bastante amikala. Ma, ampeso una diskusyon relijyoza ke los opozo de sorte ke la tadre, arrivando al “Kervansaray” estavan kaji arravyados.
Entervalo de la noche, el papaz non auzado al klima kayente i kansado del largo viyaje, kayo hazino grave. Rashi, fue bastante orozo de melizinar el papaz. Se puede dizir afilu, ke le salvo la vida. Akel tyempo, los rabinos teniyan una syerta konosensya de medikeriya i ansi era Rashi. Naturalmente, su viyaje fue atrazado. El papaz, remetido de su dezrepozo, lo rengrasyo kalorozamente en dizyendo:
“So tan prove ke no tengo nada para darvos. Rogo los sielos de darme una okazyon de mostrar mi rekonosensya”.
El Rashi le respondyo ke no le deviya nada i adjusto: “Si las kreensas mos separan, la relijyon portanto mos auna. La LEY de MOSHE me ordena de komportarme komo lo ize. Si algun diya enkontrash un Djudio en estrechura, le ayudash en mi rekuerdo”.
Paso anyos… Rashi tornando a Fransiya, paso por la Bohemia i se arreto en Prague. Los djudios de esta sivdad, orozos de resivir un Rav tan eminente, le izyeron muncha onor. Los djudios de Prague estavan debasho la dominasyon del Duke Wladislas ke los aborresiya i no mankava dinguna okazyon de mostrar su enemistad. Komo preva, dyo el orden de arestar este Rabino estranyero. Asigun el Duke, Rashi aviya vinido kon el buto de komplotar kontra el Rey.
La Komunidad Djudia de la sivdad estava dezesperada de ver Rashi atado kon kavenas, delantre del Duke ke, sin dubyo iva kondenarlo. En supeto, vyeron el Kardinal d’Olmutz aserkarse del Duke i dizirle: “Ekselans, no solo me esto opozando a la kondenasyon de este Djudio, afilu al kavzarle el mas chiko danyo. El es una persona de korason i konsiensya egzemplaryos”.
Toda la asistensya kedo enkantada de esta intervansyon inesperada. Alora, el Kardinal kon grande emosyon, konto komo antes unos, kuantos anyos, syendo un simple papaz, estava viyajando a Yerushalayim. İ adjusto: “Me ize hazino, i este jenerozo Rabino, me apiado”.
El Duke, despues de aver sintido esto, ordeno la liberasyon de Rashi i de darle un eskorto de onor en partyendo. Ansi, grasyas a la proteksyon del Kardinal d’Olmutz, ke aviya guadrado un rekuerdo rekonosyente, los djudios de Bohemia bivyeron en kalmo i repozo durante munchos anyos….
Sueto a todos los amigos una Fyesta de Pesah asigun el dezeo de sus korason. HAG SAMEAH. TİZKU LESHANİM RABOT.
