En Fransya, despues de la estupor doloroza provokada por las tres horrivles matansinas, las kualas (ay de esto dos semanas) se sigyeron de una manera sistematika en Toulouse ...es agora el periodo del dubyo i de las kestyones ...
Kada uno, a su manera, formula las suyas ... Evezes insidyozas, sin una baza realmente pertinente... ma tambyen otras mas sezudas, formuladas en el solo eskopo de entender lo ke de primera vista parese ser inkomprensivle ...
Pertinentes o no pertinentes, eyas obsedan el esprito de kualkyer persona, komo dolorozos puntos de interrogasyon ke oskuresen la vizyon de las valores esensyales de la vida..
En el byen konosido hebdomadaryo Franses “Le nouvel Observateur”, su fundador i shefe redaktor Jean Daniel mos dize en rezumen lo sigyente:
“İmposivle de aleshar de muestro esprito la vizyon de esta ijika djudia de 8 anyos ke sintyo sovre su syen el kontakto yelado de la arma ke devia, unos kuantos segundos mas tadre, meter fin a su vida...
Ke se paso en el esprito del asasino? Es ke el ovedesyo a una preskripsyon relijyoza? o byen, es ke ‘el ser humano’ yeva en si el risko permanente de pueder ser inhumano?” (İ mas lesho, el demanda): ”Es ke no se topa en algunos vyejos tekstos relijyozos ‘preskripsyones’ ke pueden ser mal interpretadas?”
Unos kuantos dias mas tadre, Alhad pasado, en la emisyon “İnternasyonal” del sityo fransez TV5, el Shefe espiritual Muzulmano i el Gran’Rabbino Djudyo fueron envitados a avlar sovre este mizmo sujeto ... Todo komo fue el kavzo desde las primeras oras inmedyatamente despues de la desgrasya, el primer kudyo de los dos grandes Relijyozos fue de afirmar ‘sus similitud de opinyon’ konsernando este drama, insistyendo endjuntos de no azer en ningun kavzo, un kualkyer amalgamo entre “Islam” i “Islamizmo”.
A un syerto momento uno de los gazeteros ke estavan prezentes, demando a Rav Bernheim lo ke pensa de las palavras de Jean Daniel konsernando los dokumentos antiguos?
Sin responder direktamente a la kestyon, el Gran Rabbino avlo de la posivilidad de syertos mal entendidos voluntaryos o involuntaryos, i sovre todo el insistyo sovre la avyertura del Djudaizmo enverso las otras Kreensas Monoteistas. Tambyen, el mos ambezo ke para “ser konsakrado Rabbino” el kandidato a este titolo deve azer no solo estudyos rabinikos ma igualmente estudyos universitaryos de filozofia jeneral , lo ke por seguro avre un kampo de refleksyon muncho mas grande.
En realidad, es imposivle de pensar ke en ke relijyon ke sea, se pueda toparse una insitasyon voluntarya al krimen...ma por kontra puede aver “lekturas voluntaryamente yerradas” de la parte de algunos espritos eksitados por un komplekso de inferyoridad ke los pusha inevitavlemente a dar a varyos vyejos tekstos un senso morbido.
Esto dicho, mos demandamos todos; asta ke grado de intensidad pudo ayegar el aborresimyento del matador kontra el djudaizmo para koryer detras una ijika de 8 anyos sin defensya, lakuala (pushada por su instinkto de konservasyon) fuyo adriento la guerta de su eskola despues de aver visto (de sus propyos ojos) su padre i su ermaniko feridos mortalmente? İ tambyen ke fue en el asasino, el nivel de sinizmo ke lo pusho a regretar amargamente despues de aver kumplido su djesto inyovle, de no aver sinkronizado byen su akto kriminal kon la ora egzakta de la entrada en klasa, lo ke iva okazyonar una mas grande eliminasyon de ninyos djudyos?
Para mozotros djudyos, ande ke mos topemos, ken ke seamos, es syempre la mizma kestyon: deke este odyo persistyente ke no solo mos persige komo una fatalidad implakavle, ma persige tambyen muestros ninyos en sus inosensya absoluta?
