Muy Keridos Korelijionarios,
Este anyo selebramos el “Pesah” ke es la fiesta de la libertad i de la primavera en diya de “Şabat” komo una muy buena koinsidesia.
Es ansi ke unifikamos en nuestras orasiones i selebrasiones los evenementos de “Maase Bereşit/Evento de Kreasion” i “Yetsiyat Mitsrayim/Salidura de Ayifto”.
Es una verdad ke sigun nuestra santa ley el “Yetsiyat Mitsrayim” se denomina komo el sentro de la transformasion del “Meavdut Leherut Umişibud Ligula/Del esklavaje a la Libertad i del Kativerio a la Salvasion” por todos nozotros.
İ la otra verdad es ke el “Şabat” es el sentro de la disiplina de nuestra Santa Tora regalada a nuestros abuelos dospues de 50 diyas de esta libertad.
De este punto de vista pudemos dizir sin ningun dubyo ke la libertad i la disiplina son los dos elementos ke kompletan i fortifikan el uno al otro.
Kon este pensamiento i entendimyento agradesemos a nuestro Dyo ke nos ayego a fiestar estas dos selebrasiones cuntos nuestros keridos i serkanos al rededeor de el pranso de “Seder”.
“Baruh Şeeheyanu Vekiyemanu Veigiyanu Lazeman Azae”
Keridos Ermanos.
El buto prensipal de la “Agada de Pesah” ke resitamos en el pranso de “Seder” es revitalizar una otra ves nuestra konsensya dentro el evenemento de “Yetsiyat Mitsrayim”.
De otra parte esto nos da la oportunidad de edukar nuestos ninyos i i ijos aprovechandomoz de esta okazion. Es por esto ke la “Agada” deve ser bien komentada, bien eksplikada i bien entedida.
No ay de neglidjar ke nuestra union i egzistensia depende de transmeter nuestra ley i kultura a las djenerasiones vinideras.
Sin embargo kale ser muy kudiadoso no solo de no komer ningun “Hamets”, tambien de no tenerlo dentro nuestras moradas. Vos kero akodrar ke este kudiado es uno de los faktos ke nos auna i nos unifika en todo modo de senso.
Vos kero akodrar una otra ves ke el apoyar i el sostener seya moralmente o seya materialmente a los diridjentes de nuestra komunidad ke siempre dan esforsos presiozos por nuestra komunidad, i ayudarles kon vuestras ideas kreativas tendra una alta valor. No tengo dingun dubyo ke nuestros ermanos tomaran parte en los esforsos semedjantes.
Siendo yeno de estos pensamientos i sintimientos vos bendigo a todos vozotros kon todas las bendisiones de la Santa Tora i vos auguro un buen Pesah kon todos vuestros keridos i serkanos dentro union, salud, pas i prosperidad.
Şabat Şalom
Hag Pesah Sameah
Rav İsak HALEVA
Gran Rabino
