El enverano es una sezon ke plaze a munchos dentre mozotros. El tyempo es kayente, entramos a la mar, la natura es vedre, estamos en las kayes, mos topamos kon los amigos para avlar i pasar el tyempo kon felisidad.
Este anyo esta tanto kayente i umido (nemli), veramente la kalor no esta azyendo plazer ma mos esta deranjando. No tenemos la enerjiya de azer kualker koza.
Komo de koza!... Las personas no estamos kontentes de nada! La kalor, la yelor, los problemes de kadal dia, los ijos, los paryentes, los amigos!...
La vida troko enteramente…
Dingunos no tyenen pasensya de suportar al den frente.
Tanto estamos tomados de los penseryos ke dingunos no esta puedyendo suportar una kritika (eleştiri) mizmo del mas serkano.
Esta situasyon se esta refletando (yansımak) a todo modo de koza.
Partikolarmente, la armoniya entre la famiya; madre, padre, ijos, ijas no se esta puedyendo avlar.
Los mansevos estan panaris para patladear.
Si avlas una, estan respondyendo dyes.
Los mushos (dudak) me se estan apegando de no pueder avlar. Komo de vida ke vinimos!...
La semana ultima asisti a tres evenementos.
Una fashadura, una nochada de una organizasyon i a un meldado. Diferentes personas de edades diferentes, ma el mizmo sujeto en todos los lugares.
Los mansevos, muestras ijas i ijos, sus vidas, el lavoro duro sin oras ke no estan respirando tanto estan okupados en sus profesyones, no estan orozos, porke estan ganando poko, i no estan abastesyendo o lo ke keren alkansar.
Munchos divorsos i muncha asimilasyon.
Kada semana estamos oyendo tres kuatro mansevos ke se estan espozando, kazando u apalavrando kon mansevas de otra uma.
Ande mos estamos iyindo!...
Esta atitud (gidişat) puede trayer la fin del djudaismo.
Los paryentes estan dando apoyo a sus ijos en dizyendo; “Aaa mi ermuera es hanum, mi yerno es pahsa, mijor de un djudyo”. Eya estudyada, la famiya koza de ver !.....
El dover de las madres deve de ser; de azer renkontrar los ijos i ijas en avlando los unos kon los otros. Ay una manseves briyante en todos los puntos de vista.
Rogaremos ke tengan buenas renkontros i todo ke les kamine komo myel.
