Ay unos kuantos dias ke tengo en la mano el ultimo livro ke muestro kerido amigo Naim Güleryüz intitulo “Toplumsal yaşamda Türk Yahudileri.” Si Elie mi marido estava ainda en vida, el por seguro diria “un livro muevo es una huente mueva de saveduria”.
Al pareser, el objektivo de este livro es antes de todo de prevar ke durante diferentes epokas desde los anyos 1492, las aktividades de los myembros de muestra komunidad no fueron unikamente limitadas al kampo komersyal.
Por seguro ke, komo fue tambyen el kavzo en otros lugares del globo terreste, los djudyos kon sus esprito en mizmo tyempo analitiko i deduktivo i sus konosensya de varyas linguas estranjeras, kontribuaron muncho al interkambyo ekonomiko del ‘payis ke les dyo akolyo’ kon varyas otras potensyas estranjeras, lo ke munchas vezes fasilito mas tadre la kreasyon de relasyones diplomatikas’.
Desde las primeras pajinas i mizmo desde la prefasya, Naim Güleryüz mos mete ‘facha a facha’ kon lo ke fueron los empesijos de muestra komunidad, las kondisyones en las kualas eya nasyo i poko a poko se desvelopo sovre las tyerras hospitalyeras del Emperyo Otomano i de la Turkia.
Segun lo ke este livro me aze pensar, dos faktores primordyales paresen aver dado vida a lo ke es muestra kolektividad: Primo, el kayente resivo del Sultan Bayezid II ke avia mizmo embiado naves para konsolidar la seguridad en mar de los ke kerian refujyarsen sovre sus tyerras, sin por esto egzijir de eyos la mas chika renunsyasyon a sus fey komo a sus tradisyones ansestrales. I segundo, ‘la kualidad de los muevos ayegados’, muestros ansestres ainda empapados de una kultura ke les avia kedado de la epoka de Oro,durante la kuala savyos de las tres relijyones monoteistas avian alkansado el punto kulminante de la sagasidad en esforsandosen de mantener antes de todo una syerta koezyon entre eyos.
Komo mo lo dize el autor del livro, una de las primeras novedades de akeyos tyempos, ke muestros primeros avuelos trusheron kon eyos, fue la “imprimeria” afin de propajar la syensya a la mas grande kuantidad posivle de personas, ma ke las autoridades lokales no adoptaron immedyatamente afin de no danyar al pan de nombrozos kaligrafos.
Por kontra en munchos otros kampos de aktividad intelektual i ekonomika komo tambyen manual, se sintyo desde los primeros anyos de la prezensya de muestros antepasados, sus partisipasyon mas o menos importante en la evolusyon del İmperyo.
En la mezura ande esto le fue posivle, Naim Güleryüz avlo de las aktividades en las kualas muestros avuelos se afirmaron, komo: ‘La Ensenyansa al nivel universitraryo’, ‘La Kultura i la Edukasyın’, ‘La Literatura’, ‘La Prensa’, ‘La Muzika’,’La Medikeria’, ‘El Derecho’, ‘el lavoro parlamentaryo i diplomatiko ets...ets...
Ansi, oy en dia, muestros korelijyonaryos todo en konservando sus espesifidades relijyozas i sus propya identidad, pudyeron mesklarsen a la vida del payis , komo si uvo un akordo tasito entre ‘las Autoridades dirijentes’ bastante komprensivas sovre varyos puntos i ‘los djudyos’ ke syempre se mostraron muy fideles i tambyen diskretos en sus manera de bivir.
‘Esto’ aseguro una atmosfera de armonia, la kuala malgrado chikos klivajes inevitavles, puede servir oy en dia de modelo a los insesantes problemas envezes muy trajikos del movimyento aktual de imigrasyon en diferentes rejyones del mundo.
El livro de Naim Güleryüz no es la pintura de la Istorya al nivel mundyal, la ke yamamos la “la İstorya İnternasyonal”, ma simplemente de la Istorya de un grupo de ombres i mujeres, a varyos momentos de sus vida, a traves los grandes i chikos eventos de la epoka i del payis ande se topan...
En su desvelopamyento mizmo, esta Istorya es ‘la repuesta’ ke este mizmo grupo de personas dyo syempre a kada mueva situasyon, kon sus reaksyones i su manera de resivir o luchar kontra los akontesimyentos, los kualos kon grande frekuensa azen parte de su destino.
