En un kanal de T.V, ande sale el Prof. Dr. O. Müftüoğlu, topo de vez en kuando la oportunidad de eskucharlo. Djustamente fue ansi myentres los diyas ke estava yo preparando mis tekstos sovre la Memorya (E.A Nos. 86-88). Dos diyas konsekutivos avlo por los “Problemas de la Memorya İ Kaminos de impedirlos”. Asigun los investigadores, verso los 50 (edad), un grande shifro de personas ampesan a reselar sovre la pedrita de la memorya.
Por siguro ke todos dezeamos tener una buena memorya i ansi konservarla. La primera kondisyon para esto es tener una buena salud. Egzaktamente komo el proverbo turko ke dize:”Sağlam kafa sağlam vücutta bulunur”(Meoyo rezyo se topa en puerpo rezyo). Devemos azer esforsos para enforteser muestro meoyo, par konsekuensa, muestra memorya. Ya eskrivi bastante sovre este sujeto en mis tekstos de E.A.
Keridos lektores, oy vo mirar de transferarvos lo ke me kedo en mi Memorya, de lo ke sinti en la T.V. Ya tomi chikas notisyas, el karar ke pude alkansar. Aki, los konsejos del Prof., dizyendo ke konservar la memorya es mas fasil i siguro ke desveloparla. Ansi:
1) Primo: no penesh a akodrarvos todo. El Ombre invento la gia telefonika, el post-it, el karne de adresos ets…para ke uzesh en kavzo de olvido.
2) Azed un plano, organizavos. Si keresh azer vuestros echos en su ora, su diya, devesh emplear vuestro tyempo kon metodo. Arremedyavos de un kalendaryo para organizarvos sin nada olvidar.
3) No vos olvidesh los lugares de vuestros objektos. Tomad la “abitud” muy efikache de guadrarlos o pozarlos syempre en el mizmo lugar. Atansyon! No trokesh este lugar en kada nada.
4) Azed una lista. En una manera i aki tambien se trata de organizarse. Si tenesh munchas kozas de azer, el mijor kamino de no olvidar es azer una lista de lo ke keresh terminar kon “prioridad”. Ansi, despues puedesh olvidarlo kon alma repozada, kada vez ke echash una vara enriva el echo eskapado. Es un kamino de aminguar vuestro “stres”. Vos konsejo de azer una lista mueva de los echos ke kedaron para los diyas sigientes.
5)Sentralizavos, konsentravos kon el sujeto de akel momento. Esto es el mas simple ayudo para la memorya i malorozamente el ke neglijamos muy frekuente. Por egzempyo, si estash avlando kon un kliente, no asperesh ambezar de kavesa el nombre de un otro kliente. Porke es imposivle de akodrar mas despues una enformasyon ke no “entro” a vuestro selevro (meoyo).
6 ) Azedchikosrezumes de lo ke vos ambezatesh muevamente. Puedesh tomar kurtas notisyas i guadrarlas en vuestro dosye o en un lugar de vuestra preferensya. Naturalmente este konsejo es en kavzo ke pensash utilizarlas mas despues.
İ aki, dos konsejos sovre la salud. Pratikar regolarmente egzersisyos fizikos pueden renforsar vuestra memorya. A la fin de syertas bushkidades se konstato ke los ke azen periodikamente egzersisyos de “Aerobik”, fueron mas reushidos en los testes de memorya, komparando los ke no azen. Al pareser el egzersisyo fizik puja el “randman” (la produksyon?) de oksijen en el meoyo.
Finalmente, un buen eshuenyo la noche, puede krear mirakolos para vuestra memorya. Otros testos del mizmo djenero amostraron ke los ke se espertan en medyo del suenyo ke ven, no reushen en estos testes. Durmir oras regolar, en mizmo tyempo es una “Sursharj” del puerpo, lo ke vos ayuda a konsentrarvos a vuestro lavoro i a otros chikos detalyos de la vida.
Keridos lektores, agora me akodri ke en mi manseves no empleavamos muncho el byervo “Memorya”. Puedo mizmo afirmar ke no era uzado muy frekuente syendo ke muncha djente no lo konosiyan afilu. Naturalmente es mi opinyon. Diziyamos “Kedar en el Tino”. En todo kavzo, oy en mi teksto, vos prezenti unas kuantas sitasyones de un program de T.V ke “me kedaron en el tino”. Konstati ke i yo desde ke ampesi a entrar en edad, otomatikamente ampesi a pratikar los 6 primeros konsejos. Reelmente son muy efikache. Vinyendo a egzersisyos fizik, me esto kontentando solo de un “jogging” en la mezura ke me permeten mis pyezes. Memorya buena a todos los amigos…
