En los ultimos dias, tuve la okazyon de asistir a un funeral i a dos bodas. Estos evenementos son una partida de la sirkulasyon de la vida (hayatın akışı).
Las tradisyones djudias son la baza de bivir i kontinuar la vida sovre las reglas.
En supito mos vino el enverano despues de un invyerno muy fuerte i yelado.
Siguramente ke el enverano es una sezon ke se bive kon egzaltasyon i un entuzyasmo. Los tyempos kayentes enaltesen el moral de la persona i el optimismo. Todos se van a los viajes, a las islas, entran a la mar, pasan el dia en las kayes.
Ma esto todo no deve de azer olvidar las valores (değer) ke dan un senso (anlam) a muestra vida.
La dinyita (onur), la onestedad (namus), i dar onor al den frente son los konseptos emportantes de las valores. Posedar (sahip olmak) estas valores; es posivle kon dar (vermek), azer sakrifisyos i no kon tomar (almak).
Por egzempio, iyir a kaminar porke el tyempo esta muy favoravle, i no asistir a un funeral u a una boda de un amigo ke tyene lugar emportante en muestra vida, no es una manera de komporto de la persona.
Malorosamente komo padres i madres no estamos puedyendo edukar a muestros ijos, ijas.
Kale ambezarles ke kuando estan envitados a una boda por egzempyo, no es solo iyir a baylar la noche, komer i bever. Lo mas emportante es de asistir a la boda en la sinagoga para onorar la novya, el novyo i sus paryentes.
Mizmo si no estan envitados a la nochada, kale iyir i mostrar el apoyo (destek) al amigo u amiga.
Puede ser es un grande sakrifisyo de deshar los amigos, la mar, el sol para iyir a la boda.
Ma la fraternitad, la senseritad i el devuamyento son los konseptos ke demandan este sakrifisyo.
Una vez ke estamos bivyendo kon el entorno, para ke las relasyones seygan armonyozas (uyumlu), entre mozotros, kale azer atansyon a muestro komporto (davranış), porke todo es resiproko (karşılıklı).
Para pueder ganar la amistad del den frente i ser aliado (dost); la persona deve de dar muncho de si (kendinden vermek) i deve de azer sakrifisyos.
Enfin, viniremos a la ermozura del enverano.
Keridos lektores, vos esto ogurando un enverano kon muncha sanedad, gozo i felisidad.
