Komo lo dize la Prensa oksidental, dia de Alhad el 3 del mez koryente, una espektakular manifestasyon organizada a la okazyon del Jubileo de Diamante (anniversaryo de los 60 anyos) del reynado de Elizabeth II, izo arrebivir en Londra, los dias gloryozos de la Monarshia İngleza.
Komo lo dize la Prensa oksidental, dia de Alhad el 3 del mez koryente, una espektakular manifestasyon organizada a la okazyon del Jubileo de Diamante (anniversaryo de los 60 anyos) del reynado de Elizabeth II, izo arrebivir en Londra, los dias gloryozos de la Monarshia İngleza.
Kaji 1000 embarkasyones desfilaron sovre el Tamis, selebre rio del payis, eskortadas por naves ke tuvyeron eyas mizmas un selebre pasado historiko
La Renya se topava en una de entre eyas, vestida de blanko i grizo klaro, sovre la kavesa uno de sus eternales chapeos, akompanyada de su marido el Princhipe Phylip aedado de mas de 90 anyos, de su ijo Charles, su ermuera Camilla i su inyeto William (probable suksesor a la korona) kon su mujer.
El entuzyasmo del puevlo era inmenso, miles i miles de sitizanos de varyas partes del payis,se rekojeron sovre los bodres del ancho rio, ekspresando sus fervor enverso sus reyna i sus orgolyo de ser sus fideles sujetos.
Portanto, aun la grande Euforia de la populasyon, varyas kestyones vyenen al tino:
Malgrado la partisipasyon de muy rikos donadores ke van asumir la mayor parte de los gastes, kuanto va kostar esta somptuoza selebrasyon al Budjeto defisitaryo de la İgelterra ke se topa aktualmente en perioda de dura resesyon? kuanto kada sivdadino va tener a partisipar individualmente?
En una epoka de terrivle kriza ekonomika mundyal i de enorme sed de ekilibro en kaji la totalidad del mundo oksidental, komo eksplikar este enorme enkorvamyento en sinyo de respekto, de la parte de los tres kuartos de la Nasyon İngleza, habitualmente rezervada en la manifestasyon de sus sentimyentos?
Komo entender estas olas espontaneas de karinyo por sus Reyna, de la parte de kaji la totalidad de un puevlo ke (syete o ocho siglos antes) en el absolutizmo de “la Edad Medya”, reklamo i obtuvo un empesijo de otonomia (sea solo para sus barones) ahuera de la otoridad del Monarko? tal ke lo prova la “Magna Carta”, dokumento ke se topa muy probablemente a la baza de lo ke fue syeklos i syeklos mas tadre, su bushkida de un ekilibro entre el puevlo i el Organo governomental?
Es verdad ke (a la eksepsyon de un chiko periodo de intransijensya personal enverso su ermuera Diana, la kuala kon un muevo estilo de vida, supo devenir en poko tyempo el idolo de la nasyon) el Reynado de Elizabeth II fue muy rekonfortante para la populasyon İngleza, espesyalmente en su nostaljia del gloryozo Pasado ke fue el suyo.
