Si, a la memoryo de la persona ke aksepto de asumir solo la responsabiilidad de mantener syempre biva la pajina Juedeo-Espanyol en el Şalom, uno de sus ultimos poemas: (tekstualmente)
SEGUNDA PRIMAVERA
No es la primera ves ke so enamorado!
Yerro de kreyer vejes triste kon amargura,
Si kon una roza oy, mi alma se enflora
I mi korason bola en un sonio dorado.
Kon fuerte boz digo al ermano aedado,
No eskondas tu amor detras de una mintira!
Haze grasias al Dio por regaloza Natura
D’aver sido ejemplo d’un ombre fortunado.
Todo mos sembla mas bello : la flor gole mejor,
El mundo se aze muy dulse, no se ve feor,
Es naser de nuevo para krear Ermozura !
El importante selozo ke bive sin amor
Solo, ridikuliza valor del kompozitor
Por las ovras realizadas en Segunda Primavera.
El 20 Marzo del 2001
Salamon Bicerano
