La semana ultima asisti a dos bodas maraviyozas en Neve-Shalom.
Kualo es el kazamyento?
El kazamyento es un evenemento ke se produisa kon la veluntad de una mujer i un ombre ke se keren byen, i demanda muncho esforso.
Dos personas diferentes, ke vyenen uno de kada lugar i se renkontran debasho de un tejado, es difisil de akordarsen.
La amistad resiproko, es un kontakto limpido, muy presyozo entre dos keridos i aze naser la kerensya.
La Kerensya es pueder asosyar dos karakteres diferentes kon un esforso resiproko.
La baza de la kerensya es el respekto.
El kazamyento es el nido ke fonda la mujer i el ombre endjuntos i forman una famiya. Kon el tyempo el kazamyento da frutas, ijos, ijas i la famiya se engrandese. La famiya es un konsepto (kavram) sakro i la baza de la komunitad (toplum).
Mozotros devemos de arekojer a los mansevos i a los aedados para kontinuar las relasyones; no alesharmos unos kon los otros en este dor, para ke muestros ijos puedan azer en el avenir un poko de lo ke vyeron en sus kazas.
Lo ke vyene en primero en estas relasyones es la solidaridad i el ayudo en todo modo de situasyon.
Yo penso; ke la famiya es un konsepto sakro ke no se puede komparar kon nada. En la baza de este konsepto ay la amistad, el respekto, la kerensya i la piadad. Mos ambezamos de muestra famiya; el respekto, la natura i el kerer byen a las personas.
La famiya tyene un rolo emportante para desvelopar la kreativitad de su ija u ijo.
La famiya es; la valor la mas presyoza i la mas grande en la vida.
Oguro a todos los mansevos i mansevas de ser orozos kon sus famiyas.
Antes kuatro dias asisti a un funeral de una persona de byenfesensya de muestra komunitad.
Un ombre de kultura, un byenfetor, una persona de armoniya, un buen komersante mos desho la buena vida.
Ke este en ganeden; “İzidor BARUH” teniya una enerjiya grande en todo modo punto de vista.
Kapache, muy laboryozo, ombre umano (insancıl) ke dava apoyo a todos los ke tyenen menester sin mostrarse.
El era el monumento de Byenfesensya, i de la djustisya.
Buen padre, buen granpapa i buen esfuegro, muy reushido kon su sezudeza (aklı-selim) i su saverisyo, era un ombre de ekilibro.
Modesto i djusto, en el tyempo ke lavori komo volontarya en Matan-Baseter, el fue uno de los mas grandes donatores para pueder realizar las novedades en la asosyasyon.
“İzidor BARUH” fue mas de dyes anyos el presidente del hospital “Or-Ahayim”. Lavoro de alma i korason kon su vizyon, i su inisyativa para pueder krear kozas muevas en todos los espasyos.
Atado a sus prensipyos (ilke), termino su misyon kon devuamyento (özveri) en konsumando (sarfetmek) grande esforso komo volontaryo.
El se apatrono de sus ijos, ijas, inyetos, inyetas, i chikos inyetos. Era el kapo de su famiya kon su riza kalma, la kara novle (asil) i los ojos briyandos.
Estamos muy tristes de peryer a un personaje komo el amado por todos. Ke su alma repoze en ganeden.
Pasensya a su kerida famiya, a sus amigos, i a toda la komunitad.
