Martes pasado el 20 del mez koryente, İzidor Barouh serro sus ojos a un mundo ke el syempre, durante 97 anyos, amo i sirvyo kon grande korason . El kumplio kon fervor su sakra misyon de “kriansa pensante” sovre tyerra, fue un simbolo de buendad ansi ke de komprensyon humana i inkontestavlemente desha detras de el un “model a sigir”...
İzidor era polivalente, ekselente marido, egzemplar padre i avuelo, buen sitizano, remarkavle myembro de muestra kolektividad a la kuala el konsakrava una grande parte de su tyempo i de su enerjia, syempre solidaryo kon sus semblables. I antes de todo, el savia no solo dar ma tambyen oir i entender lo ke demandava el otro..
Prezidente por un largo tyempo del Hospital Orahaim a una epoka ande esta grande İnstitusyon era mayoritaryamente yena de hazinos munchas vezes en situasyon ekonomika muy prekarya, el supo no solo asumir la karga tan difisil de su jeransya , ma en mizmo tyempo estableser un kontakto afektivo kon kada pasyente en su singularidad....
La muerte fatalmente mete fin a una vida aktiva, esto es una realidad ke no puedemos nyegar ni impedir , ma detras algunas personas keda munchas vezes trasas indelebles...İzidor Barouh era una de entre eyas, el parvino syempre a imprenyar su aktividad sosyal, partikularmente su aktividad karitativa de un potensyal afektivo muy profundo... las solisitasyones ke el resivia de varyas personas, el no las analizava solo del punto de vista lojiko, ma tambyen kon su korason...Nada le era indiferente.
Tuve personalmente la oportunidad de entrar en kontakto direkto kon el, durante el ermozo periodo de su prezidensya en el Hospital Orahaim, a una epoka ande el Barinyurt no egzistia ainda , ma solamente la Matan Baseter i ande la mizerya era profunda en syertas kalejikas al entorno de la Tore de Galata .
Munchos de muestros korelijyonaryos desfavorizados por el destino, bivian aya en un estado de prekaridad absoluta, en vyejas kazas a mitad derrokadas kon ventanas medyas rotas por ande entrava el ayre entezador del invyerno....
Kuando (en situasyon de desrepozo seryozo) yevavamos al Hospital algunos de entre eyos ke bivian solos, sin ningun serkano para darles un sorvo de agua, eyos eran inmedyatamente resividos komo “bendicho el Dyo”es syempre el kavzo en este grande refujyo. I tal ke es tambyen aktualmente el uzo, eyos resivian los kudyos adekuados los mas perfektos i la mas parte de vezes rekovravan enteramente sus salud.
Ma detras de un grande desrepozo, mizmo favoravlemente vensido, ay el importante periodo de la konvalesensya ke habitualmente se pasa en kaza, en la kayente atmosfera familyal, lo ke no pudia ser el kavzo por estos asolados ke no tenian ningun mamparo.
Entonses demandavamos a la direksyon del Hospital i partikolarmente a Izidor Barouh de detenerlos lo mas posivle, tanto ke esto no riskava de impedir la hospitalizasyon de otros kavzos urjentes. İzidor Barouh savia immedyatamente entender muestra demanda, malgrado ke nada de semejante era espesifikado en el estatuto de la grande İnstitusyon ...El savia ir mas leshos ke su dover i adaptar su desizyon segun la gravidad del kavzo.
El era un ombre de konsyensya, de komprensyon i sovre todo de humanizmo.