La Fransya se topa en este momento en un estado dolorozo de konsternasyon, de inkyetud i de una terrivle anksyedad.
Lunes demanyana a la ora 7,55 en una kaleja trankila de Toulouse, sivdad franseza situada mas o menos a 681 kilometros de Paris, una motosikleta de kolor obskura konduzida por un mansevo ke yevava un kasko integral de motosiklisto (el kual eskondia su kara) se arresto delantre la eskola djudia relijyoza “Ozar Hatorah” i mato sin razon ni el meno motivo komprensivle 3 ninyos i un adulto de 30 anyos.
Djesto loko? por seguro “Si”; krimen inyovle ke toko dolorozamente un puevlo en lo ke poseda de mas sakro “su dinyidad humana”.
La semana pasada tambyen dos krimens, a primera vista sin razon vizivle, fueron perpetrados kaji de la mizma manera, syempre en la mizma rejyon: un parashutisto en su egzersizyo i tambyen dos ofisyeres militaryos, todos de nasyonalidad Franseza.
Entre los tres eventos sin ninguna koneksyon vizivle, syertos puntos komunes: kada akto fue un akto sin razon aparente, el matador empleo la mizma arma de kalibro 11,43, el ayego al lugar de los tres eventos kriminales, sovre una motosikleta syempre de kolor obskura, i lo mas grave las tres primeras viktimas eran de nasyonalidad Franseza ma de orijen Muzulman-Magrebano ansi ke Antiyez i las kuatro viktimas de Lunes eran eyas de doble nasyonalidad Franseza/Israelyana, de relijyon djudia..
Lunes pasado, segun lo ke mostra el filmo halusinante de las tres kameras de observasyon ke se topan a la entrada de la institusyon eskolarya: el matador travo de serka, en la kaye, sovre un ombre de 30 anyos, el profesor de Ebreo de la eskola, i su ijiko de dos anyos, su ijika de 8 anyos parvino al empesijo a fuir i a entrar en la guerta de la eskola ande el motosiklisto la persigyo i parvino malorozamente a kumplir kompletamente su djesto kriminal i a travar tambyen sovre una kuatrena viktima.
El prezidente Sarkozy akompanyado del ministro de la kultura i del prezidente del “CRIF” (Konsilyo reprezentativo de las Institusyones djudias de Fransya), koryeron lo mas presto posivle al lugar del drama. El prezidente del partido sosyalisto ayego poko mas tadre, el tambyen en estado de fuerte emosyon, todos undidos en la estupor …
La kampanya elektoral se arresto inmedyatamente por un syerto tyempo… Sarkozy deklaro ke en este momento la Fransya deve ser unida i azer fronto komun.
Un grupo de enkuestadores fue kargado de azer (kon el ayudo de un ekipo de psikologos) investigasyones profundas. Las hipotezas son nombrozas sin ke ninguno se akometa a formular (por el momento) kualo ke sea. Se supoza timidamente una semejensa kon el drama ke fue perpetrado en Oslo, sovre una chika isla, el anyo pasado.
Niguna konfirmasyon, ningun komentaryo seryozo, simplemente ipotezis puede ser sin ningun fundamyento. En todo kavzo,todas las posivilidades seran estudyadas minusyozamente.
Los dias avlaran…
