La ventana de vuestra ermana: La fin de la misyon de Meri Maya

Şeli GAON Judeo-Espanyol
8 Şubat 2012 Çarşamba

El 5.2.2012 alhad midi, tuve la okazyon de asistir al entregamyento del pueder prezidensyal (başkanlık devir teslimi) de “Meri Maya” a “Lida Sarfati” en la eskola Ulus Musevi Lisesi.

Fue un dia muy reushido yeno de sentimyento.

“GOLDEN AGE” es la unika organizasyon a mi idea;  una de las mas emportantes komo el dover i la misyon ke tyene, de tomar debasho sus alas (kanatlarının altına almak) los aedados, para okuparsen de eyos seyga yevandolos a kaminar, a komer un peshkado en el bodre del Bosfor, seyga  a azer diferentes aktivitades para azer pasarles unas kuantas oras kon felisidad (mutluluk).

“GOLDEN AGE” la organizasyon ke partaja la kerensya, la amor umana, la amistad oy tyene 10 anyos

Es una organizasyon ke da esperansa i amor a los ke estan solos en la vida.

En primero “Rozi Hason” prezento el dia, en dando detalyos sovre la misyon de Golden Age, i la envito a “Lina Filiba” una de las fondatrisas de esta asosyasyon.

En su avla; eya dyo emportansa a los sujetos de ser volontaryos, a la ermozura de dar sin asperar nada i a la kerensya ke es la baza de este lavoro.

“Esta organizasyon se fondyo el 19.11.2001 kon la grande ayuda i esforso de “Bensiyon Pinto” i

“Eti Pinto”.

En el anyo 2002 “Meri Maya” ampeso a lavorar komo volontarya i la izyeron presidente.  Eya termino su avla kon una poeziya.

“Ay korasones para azer

Pueder bivir la Kerensya,

Ay personas

Para partajar la Amistad,

Ay Misyones Sakras

Para todos mozotros”.

Despues “Bensiyon Pinto” izo una avla kurta ma muy sinyifikativa. Kuando termino, “Eti Pinto”, el Presidente de muestra komunitad “Sami Herman”, tres partisipantes de Golden Age; “Ester Moskoviç”,

“Lora Karidi” i “Yusuf Blok” avlaron i remersyaron a la presidente “Meri Maya” kon su ekipa por sus kudyos i el entereso ke les amostraron.

A la fin “Meri Maya” ampeso su avla en felisitando “Tu Bishvat” ke es la fyesta de las frutas i la novela de la primavera.

“Kon todos partaji la kerensya, i la amistad. Esto muy kontente ke lavori tantos anyos i va kontinuar a  lavorar para ayudar. Esto remersyando todas mis kolavoradoras,  a todos los presidentes ke mos ayudaron para topar la moneda menesteroza i lugar para azer muestras aktivitades”.

Lo envitaron al “Grande Rabino Rav. İzak Haleva” para darle el regalo de su ekipa.

“Rav. İzak Haleva” disho; ke no es fasil de okuparse de los aedados, i se kere una pasensya muy grande. La felisito de konkluir (sonuçlandırmak) su misyon kon grande devuamyento.

A la fin su marido kon el inyeto luzyo de sinko anyos la felisitaron en dandole un buketo de rozas.

En muestro pais i en muestra komunitad, apatronarse de los aedados, es una valor muy emportante. La baza de pueder bivir endjuntos i de la solidaridad, es la Kerensya i el Respekto resiproko.

Por esta kavza; kale akudirlos para pueder aminguar sus problemas i topar solusyones para ke bivan mas orozos. Muestra misyon deve de ser, de amostrar la kerensya i el respekto menesterozo a muestros aedados; i lavorar para kitar sus apretos de korason, i para atarlos a la vida.

Los vyejos son los espejos de muestro avenir.

“Golden Age” ke sinyifika “LA EPOKA DE ORO”, se okupa de las nekoçeras i nikoçiris.

La presidente muy laboryoza “Meri Maya” kon su ekipa de 30 volontaryas lavoro 10 anyos de alma i de korason pensando syempre al den frente.

Ser volontaryo es una manera de bivir. Es un evenemento ke sostyene la alma de la persona (insanın ruhunu beslar). Eya franka (açık sözlü), akorrida, apiadosa, persona yena de enerjiya lavoro kon ardor i reusho en todo modo de espasyo.

A la fin, la mueva presidente “Lida Sarfati” remersyo a todos los ke partisiparon a este dia emportante.

Para alegrar a todos;  el grupo

“Los Pasharos Sefaradis” ke son; “Karen Şarhon”,

“İzzet Bana”, “Selim Hubeş” i “Yavuz Hubeş” kon dos profesyonales kantaron munchas kantikas.

Todos aplodisaron i kontentes de las oras ke pasaron se metyeron al kamino para tornar a sus nidos.

Fue un dia reushido yena de emosyon i kerensya.