Una grande Seremonia de rekuerdo fue organizada en la Sinagoga Neve Şalom, Djueves la tadre (a la djudia) Noche de Vyernes el 27 Enero, data kualifikada de la parte de las Nasyones Unidas “Dia de Komemorasyon de la SHOAH”, desgrasya lnegualavle de ferosidad i salvajeria.
Muestra ermoza Kehila estava yena de djente, yena de grandes Personalidades del Governo komo tambyen de la Munisipalidad, ansi ke de reprezentantes de varyas organizasyones estranjeras i djudias, de dirijentes i myembros de kaji todas las ovras, de notables i por seguro de multiples yahidim. Fue tambyen kombidado: uno de los raros sovrebivyentes del jenosidyyo, muestro amigo Lazar Russo salvado del inferno de los kampos de konsentrasyon grasyas a su pasaporto Turko.
Para munchos de entre eyos, la emosyon era grande, empapada de tristesa i amargura. İ syempre las mizmas kestyones ke kedaran asta la fin sin repuesta: “deke un semejante akto infame? Komo una tala salvajeria pudo ser perpetrada en un mundo ke paresia aver ayegado a un alto nivel de sivilizasyon?
El Grande Rabino İzak Haleva i el Vali de Estambol Avni Mutlu asendyeron kandelas a la memorya de los 6 milyones de viktimas i Rav Haleva, las manos avyertas en direksyon del Todo Poderozo disho “Dyo Santo i Piadozo ke maz nunka muestro mundo no seya testigo de una tala desgrasya”.
De su parte, el Grande Embashador Ertan Tezgör ke pronunsyo un esmovyente diskorso, disho: ”6 milyones de personas fueron eksterminadas, unikamente porke eran djudias, i munchos payizes de la Evropa kedaron espektadores...”
De mezmo el Vali de Estambol Avni Mutlu i el Prezidente de muestra komunidad Sami Erman tomaron tambyen la palavra i ekspresaron sus sentimyentos de amargura.
El Mensaje mandado por el Sekretaryo Jeneral de las Nasyones Unidas “Ban Ki-Moon” ansi kel de Claude Lanzmann ke no pudo venir por kavza de desrepozo de salud, fueron parsyalmente meldados i projektados de la parte de Jozef Nasi, i la Avokata Rita Ender tomo la palavra al nombre de la kolektividad Djudia.
