El konflikto entre İsrael i Palestina no se puede solvar kon las desiziones tomadas en las Nasiones Unidas’ disho Obama, en su deskorso en la asamblea jeneral de las Nasiones Unidas ke tomo lugar en New York, la semana pasada. ‘La pas no va ser tan fasil. Si era tan fasil, fin agora este viejo konflikto ya iva ser rezolvado. Los ke vana bivir lado kon lado, son los İsraelianos i los Palestinianos. Solo eyos pueden topar las solusiones de las kestiones ke los diviza’.
En su deskorso, Obama no avlo mezmo un solo biervo sovre los esfuersos de Mahmud Abbas, el Prezidente de la Otoridad de Palestina, para azersen miembro de las Nasiones Unidas. Obama se entereso solo de los esfuersos ke eyos pueden eyos azer para prokurar la pas en el Medio Oriente.
‘En forsando estos dos paizes, no puedemos reushir a azerlos pas’ disho Obama. En su deskorso, el Prezidente repeto munchas vezes, ke los Estados Unidos tiene una profonda amistad kon İsrael, i adjuto ke antes de todo, la seguridad de İsrael deve de ser prokurada en un akuerdo entre las dos partes. ‘La solusion de este konflikto se va topar kuando los dos paizes se vana ambezar a entendersen de parte a parte’.
Obama dediko una parte de su deskorso a eksplikar los trokamientos radikales del anyo pasado, espesialamente en el norte de Afrika i en el mundo arabo. ‘Los diktatores fueron destruidos kon los muvimientos de la demokrasia, i mos salvimos de Osama bin Laden. La idea ke el trokamiento puede vinir kon la violansia, fue enterrada kon este grande teroristo’ disho Obama.
Mas duspues, kon Obama a su lado, Natenyahu izo unas kuantas deklarasiones a los gazeteros. Natenyahu disho ke esta remersiando Obama por el suporto ke el dio a las negasiones direktas entre İsrael i Palestina.
La administrasion amerikana djuro de dar veto a kualsiker propozision de la Otoridad Palestiniana. ‘Solo las negasiones direktas de pas vana permeter a los palestinianos de pueder aprovecharsen de los benefitos de ser estado. Dingun voto en las Nasiones Unidas no vale a nada’ disheron eyos.
En las konversasiones de pas, los Estados Unidos i los parteneres enternasionales, estuvieron negosiando sovre los pasos ke pueden tomar esta semana, para pueder trayer İsrael i Palestina a la meza de negasiasiones.
Los kuatro mediatores de pas, los Estados Unidos, la Union Evropeana, las Nasiones Unidas i Rusia, formularon una deklarasion adresada a İsrael i a Palestina, i determinaron una data i un program por el retorno a las konversasiones de pas.
La situasion mueva esta muy diferente del senerio de Obama, en la asamblea jeneral de las Nasiones Unidas del anyo pasado. ‘Devemos de topar la mijor solusion para solvar este konflikto. Una pas permanente se puede prokurar solo kuando las dos partes estan dakordo’ diso Obama.
Entremientes, Natenyahu remersio el Primer Ministro de Kanada, Stephan Harper, por su suporto a İsrael. En la asamblea, Harper se opozo a los esfuersos de los palestinianos para pueder ganar el rekonosimiento de las Nasiones Unidas.
