En la atmosfera de mas a mas obskura de estas ultimas semanas, me esforsi de engancharme a un akontesimyento ke vo tener el koraje de konsiderar komo luminozo en un kampo totalmente diferente de los problemas aktuales:
El es: el ultimo livro de Alexandre Adler grande pensador djudyo-Fransez, muy byen konosido en el mundo intelektual oksidental, profundo i en mizmo tyempo renovador en su razonamyento i en sus analizes sosyo filozofikas i jeopolitikas, del kual tuve la oportunidad de asistir a un djenero de kambyo de refleksyones kon el grande Rabbino Josy Einsberg, ke la televizyon franseza mos dyo Alhad demanyana el 8 del mez koryente en su programa hebdomadaryo konsernando las tres relijyones Monoteistas.
Ken es Alexandre Adler? Aunke grande Sionisto muy atado al destino de Israel i a sus problemas, su relasyon kon la relijyon djudia fue asta agora kaji invizivle, por kontra su ultimo livro entitolado “le Peuple Monde” (El Puevlo Mundo) parese segun munchos komentadores, imprenyado de un djenero de espiritualidad…
Alhad el 8/1, el mizmo dia ke su entrevista kon Rav. Josy Einsenberg, Alexandre Adler mando al kotidyano “Le Figaro” una eskrita ke (si no me yerro) relata su enkontro kon el grande relijyozo djudyo i ande figuran unas kuantas kestyones i repuestas a mi pareser muy interesantes.
Al empesijo del teksto ke fue mandado, figura un komentaryo del kual no topi la sinyatura, sovre la ovra en kestyon, komentaryo ke me esforso de traduzir kaji literalmente i ke vos do debasho estas linyas:
“Kualo es ser Djudyo? Deke este puevlo obseda la historya del mundo?
İndo mas leshos kel kampo Jeopolitiko, Alexandre Adler mos da en este ultimo uvraje una refleksyon filozofika muy intima, en la kuala kon lirizmo i emosyon, el mira de topar su relasyon personal kon el Djudaizmo i mos envita a pensar de muevo las grandes revolusyones antropolojikas ke markaron el Oksidente de Spinoza asta Einstein en pasado por Marx i Freud.”
İ despues vyene la primera kestyon formulada de la parte de Rav Einsenberg:
“Despues la kaptividad en Babilonya, la destruksyon del segundo Templo de Yerushalayim, la Espanya de 1492, los pogromes en la Evropa i la Rusia, el kavzo Dreyfus, la Shoah i el aktual konflito Israelo-Palestinyano, eske dizeresh ke “ser Djudyo puede konstituir un problema?
Adler respondyo
“Paradoksalmente , kero dezir ke no es un problema, porke al fondo, el djudaizmo se bive i no se pensa.......no ay ortodoksia ma una syerta “manera de ser” ke provyene de la edukasyon i de la transmisyon, i ke se bive de una manera inkonsyente , lo ke aze ke ay en el Djudaizmo una koza de “ no biodegradavle” .......El eskritor kubano Eduardo Manet es un egzempyo tipiko de estos maranos ke abandonaron el Djudaizmo desde siglos, todo en konservandolo en eyos. El konto komo su orijen le fue revelada de la parte de las mujeres ...Esta djudaidad transmetida a boz muy muy basha es de una ekstraordinarya rezistensya.... dunke al lugar de verter lagrimas konsernando la difikultad de ser Djudyo, kero dezir ke es muncho mas fasil ke lo ke se pensa......ay la alegria de una konivensya,de un djenero de komplisidad kon una kultura, kon el umor byen konosido i tambyen ay el ekilibro entre” la individualidad” ke nunka es totalmente oprimida i el ”senso de la komunidad” ke no es nunka enteramente absente.
Mas leshos Adler mos dize:
Kuando un puevlo de la Antikidad pedria sus templos, sus idoles i ke no tenia mas tyerra debasho sus pyezes ,el desparesia...el kavzo no fue ansi para los djudos, porke al momento de la kaptividad de Babilonya, eyos konsideraron ke sus patria no sera mas sus tyerra, ma este elemento ke puedian syempre yevar kon eyos: “La Torah” patrimonyo espiritual....
İ ansi kontinuo este kambyo de ideas ... No se si pude parvenir a transmetervos un poko de la manera de pensar de Alexandre Adler, el teksto es bastante difisil a transledar. En todo kavzo fue realmente un luminozo akontesimyento de verlos avlar el uno en frente del otro, “un relijyozo” i “un kaji ateisto”, dos personas fundamentalmente diferentes en sus aspirasyones, ke parvenian a kambyar ideas i opinyones kon serenidad i sovre todo kon la voluntad de oir i entender lo ke dizia el otro....
Vos vo puedeser dar en el proksimo “El Amaneser”la traduksyon de otros pasajes sovre lo ke, segun A. Adler, desferensya enteramente el Djudaimo del Kristyanizmo, i por kontra lo ke aze la grande proksimidad entre muestra relijyon i el Islamizmo....
