Despues largos mezes i mizmo anyos de sufriensa, syempre en el silensyo i la trankilidad al pareser kaji serena ke era una de sus karekteristikas, muryo:
Korin Leba ansyana direktora del Barınyurt, la kuala serro su ojos por syempre, prematureamente, a la edad de 62 anyos.
Eya fue mas ke una perfekta direktora del Barınyurt, konsyente de la responsavilidad de su karga, lo ke por seguro es primordyal; i, sovre todo, eya fue komo una ija i una ermana para los pensyonaryos aedados komo igualmente para los mansevos ke no tyenen la posivilidad de giarsen solos en la vida...
Korin Leba savia dialogar kon eyos... entender sus soledad, entender sus desmamparo de ser leshos de sus entorno familyal, entender antes de todo sus dezeos i aspirasyones munchas vezes irrealizavles...eya les avlava kon dulsor para sinyifikarles ke los entendia i ansi los rekonfortava.
Muestras sinseras kondolensas i la ekspresyon de muestra profunda tristeza a su madre, sus ija i ijo, ansi ke a todos sus serkanos i sovre todo, sovre todo, a su kompanyero de vida “Bension Eskenazi” ke durante largos anyos fue para eya un refujyo de serenidad i de amor, iel kual los ultimos mezes, no se despartyo ni un punto de su kavesera.
