La ventana de vuestra ermana Detras las fyestas saludo al invyerno

Şeli GAON Judeo-Espanyol
26 Ekim 2011 Çarşamba

Ya pasimos las fyestas; Rosh-Ashana, Kipur, Sukot i Simha Tora kon grande antuzyasmo.

Esperamos ke la mueva anyada sera para mozotros, todos los djudyos del mundo; una anyada yena de esperansa, sanedad, trankilitad i pas.

Este anyo komo la sinagoga de Burgaz estuvo serrada, fyestimos kon mi marido i mi famiya, las fyestas en Neve-Shalom.

Neve-Shalom; es la sinagoga prensipala i la mas famoza de los djudyos de Turkiya.

Se avyo en el anyo 1951, es la sinagoga la mas mueva i la mas grande de Estambol.

Todas las bodas ke se realizan aki, tyenen una ermozura espesyal.

Una keila es alegre kon la djente ke asiste a las orasyones, a las fyestas i a todo modo de evenemento.

Sukot es una fyesta grandioza. Malorosamente no aviya bastante djente en Sukot i Simha Tora en la keila de Neve-Shalom. Mizmo ke no aviya kriyaturas, las orasyones de los hazanes, kon sus bozes maraviyozas mos izo tremblar los sentimyentos.

Despues de este mez sakro yeno de fyestas, una de detras de otra, va mos a tener un invyerno yelado, kon tyempos ariskuros.

Esta sezon mos da la posibilitad del desvelopamyento personal, seyga en iyindo a los teatros, filmos, ekspozisyones, seyga en iyindo a los konsertos, a diferentes kursos de lingua u de pintura para pasar el tyempo en yeno.

Alhad ultimo, tuvimos la okazyon de asistir kon mi marido; a un konserto espesyal ke fuimos envitados.

Este konserto se realizo por fyestar los 150 anyos de una fondasyon (kuruluş) espesyal (özel), i se selebro de una manera perfekta.

“Cihat AŞKIN” el violonisto virtuoz ekstraordinaryo; ke dyo munchos konsertos en el mundo entero, i ke partajo la mizma shena (sahne) kon los muzisyenes famozos del mundo komo; Shlomo Mintz, Ida Haendel i Yoel Levi.

Estuvo envitado a las kompetisyones (yarışma) internasyonales komo myembro de juri en la Bulgariya, Israel, Polonya i munchos otros paises.

Cihat Aşkın gano munchos premyos (ödül).

La orkestra “Istanbul Oda Orkestrası”  de 40 personas estava dirijada por el shef “Hakan Şensoy”; artisto (sanatçı) konosido i reushido en el mundo entero.

El dirijo munchos konsertos ke se realizaron en la Amerika i en diferentes paises de la Evropa i en mizmo tyempo komo un buen violonisto fue envitado en konsertos diferentes.

A la fin del konserto; el shef kon la orkestra para selebrar la fyesta izyeron una sorpreza (sürpriz).

Komo era el aniversaryo de 150 anyos, tanyeron la muzika  famoza “Happy Birthday”; en diferentes melodias de danses; komo vals, tango, polka, rapsodi i tsigan (çingene).

Sintir Happy Birthday en diferentes melodias; mos dyo un sintimyento veneravle (ulu).

A la fin del konserto uvo un kokteyl, i tornimos alegres a muestros nidos.