Alhad el 23/10/2011, despues mas de 40 anyos de diktatura, el puevlo Tunizyano voto (en una atmosfera de kompleta libertad) los dekretos ke seran a la baza de la mueva “Konstitusyon” del payis.
La votasyon se paso sin el mas chiko insidente, en el kalmo el mas absoluto. Kaji 90 % de la populasyon en edad de partisipar, lo izo de su propya voluntad i kon grande alegria
Segun lo ke mos dize la Prensa Evropea, el partido Islamisto “Ennahda -El Renasimyento” de Rachid Ghannouchi ke es un partido İslamo-konservador moderado (semblable al “AKP Turko”) rekojo la mas grande parte de bozes, lo ke lo mete al primer plano de la seleksyon . El tyene la intisyon de aunarse a otros partidos Islamistos syempre moderados
Un myembro importante del mizmo partido deklaro ke todos los akordos internasyonales sinyados en tanto ke myembro del Otan, seran absolutamente respektados, ansi ke los derechos de las mujeres i de las minoridades .(egziste aktualmente en este payis una komunidad djudia de 1000 personas).
El porte-boz del partido “Ennahda” konfirmo tambyen ke respektara la ley en vigor en favor de la situasyon feminina, la kuala prohibe la poligamia i el repudyo de la mujer sin motivo valido.
Los rezultados de esta votasyon seran de grande importansa i es muy probable ke tendran un syerta influensa sovre los payizes vezinos.
En todo kavzo la Tunizia bive en este momento un grande momento de su destino i un adelantamyento verso una grande evolusyon de sus preseptos fundamentales.
