En estos dıyas de fyestas...

Coya DELEVİ Judeo-Espanyol
5 Ekim 2011 Çarşamba

Septembre fue syempre konsiderado komo mesajero del Otonyo, malgrado ke ay ermozos diyas ansi ke fue el kavzo oganyo. Vimos diyas de puro enverano i no de fin de enverano. Achakes de Veadar, fyestimos Rosh Hashana los ultimos diyas de Septembre, kaji tres semanas mas tadre del anyo pasado…

Mez de Tishri, una suksesyon de fyestas i alegriyas… Rosh Hashana, Simhat Tora.. No es  solamente mez  de fyestas ma,  tambien mez de orasyon, i de pardon. Yom Kipur i el Taanit…El grande savyo Moshe Ben Maimon, (1135- 1240) dize: “Esta peryoda devemos konsiderarmos komo medyo kulpantes, medyo inosentes…”.   

La Santa Biblia mos dize: (Num. (Bamidbar)-29-1) “...El primer diya del syeten mez selebraras una fyesta solemna: Rosh Ashana... Es el empesijo del anyo Djudio. Ay de demandarmos, deke el syeten mez i no el primer? Antes de topar la repuesta, kontinuaremos a meldar: “ En el dyezen diya de este mizmo syeten mez, umilyarash vuestras almas, no azerash dingun echo: Yom Kippur... İ el kinzen diya del syeten mez, no azerash  dinguna aktividad umilyante, durante syete diyas selebrarash una fyesta en la onor del Kriador:  Sukkot...

Aun ke el kalendaryo Djudio ampesa en Tishri, porke la ekspresyon “syeten mez”?? Porke la vida del puevlo Ebraiko ampeso kon la fin del “yugo”, del esklavaje de Misraim, en el mez de NİSAN. Despues sigien İyar, Sivan, Tamuz, Av, Elul i Tishri el syeten mez. La libertad es la baza de un puevlo, de una nasyon.

“Rosh Ashana, literalmente “La kavesa del Anyo” es el diya de Djustisya. Akodraremos syempre este prinsipyo ke fue establesido por los Djudios, miles de anyos antes. “Libertad i Djustisya” son la baza, sin lakuala dinguna nasyon puede egzistir”.

La primera semana de la anyada mueva ya se kompleto. Mos estamos  aparejando para  “Yom Kipur, Sukkot” i la alegriya de “Simhat Tora”. En pasadas  resivi un mesaje tratando de la realizasyon, de la konstruksyon (si se puede dezir ansi), de la “SUKA”. En primero me kontenti solo de meldarlo. En estos diyas, me lo akodri, i lo meldi de muevo. Es un teksto bastante  komplikado para mi. Kontyene ekspresyones i sitasyonas etnikas, relijyozas. Yo, syempre me detuve de entrar en la ondor de estos sujetos, porke munchas vezes  depasan mis simple  konosensyas. No me plaze tomar el risko de azer yerros...

Aun kon todo, aserkandomos de Sukkot, pensi de relatar unos, dos paragrafos ke me paresen ser mas mas simples: “A la salida de Kipur, la mizma noche se ampesa la konstruksyon de la “Suka” para metermos imedyatamente debasho la proteksyon de esta “MİTZVA”. Es rekomendado de konstruirla si mizmo, i no kon el ayudo de otra persona. La Suka deve situarse en un lugar limpyo de muestra guerta o balkon. No deve ser a proksimidad (serka) de aguas suzyas o otras suzyedades. Es tambyen rekomendado de morar, kere dezir de bivir ayi durante los syete diyas de la fyesta de Sukkot, para konformarmos a la “Ordenansa” de la “TORA”. (Levitiko (Vayikra)- 23-42.)

Despues esta sigiendo la manera de fabrikar la Suka, dando los detalyos los mas minimos, komo la kualidad i el djenero del materyal, sus mezuras, los entervalos entre kada pedaso ets... La Suka es una Mitzva bien partikolara. La Mitzva del Lulav simboliza kon sus kuatro plantas, el fakto ke malgrado las  diferensyas, los Djudios pueden i deven ser unidos.

Kero meter el punto final kon unas kuantas linyas de un ansyano artikolo miyo: Sukkot es una de las tres fyestas de pelerinaje. Shemini Atseret i Simhat Tora serran las fyestas del mez de Tishri. Kon los bayles i alegriyas, el Djudio anula su “Ego” en achetando la otoridad de la Tora. Terminamos  su lektura i la ampesamos de muevo, de vista porke no ay fin, a la palavra del KRİADOR…