El fakto de azer de la Estrea Amaria ke es en realidad ‘’el simbolo de la shoah i de la sufriensa del puevlo djudyo’’ el emblema de una manifestasyon de protestasyon kontra los derechos de igualidad de la mujer, madre de los grandes profetas, portadora de la responsabilidad de transmeter la ley djudia de jenerasyon a jenerasyon, es una indjurya echa al Djudaizmo, una indjurya echa a Israel en su prinsipyo de igualidad, i mizmo una indjurya a Dyo el mizmo en su espiritualidad i su humanizmo.
Komo se asperava, la manifestasyon de Shabat la noche, en Yerushalayim, de un bastante grande grupo de ortodokses yevando kada uno sovre si (en sinyo de protestasyon) la ‘Estrea Amaria’, provoko una fuerte reaksyon de la parte de mumerozos dirijentes del payis.
Ehud Barak, Ministro de la Defensa,deklaro ke esta desizyon es terifyante i intoleravle....
“La utilizasyon de simbolos de la Shoah es inadmesivle i la kondano radikalmente ... Esto es un atentado kontra el rekordo de la Shoah i kontra las valores fundamentales del Djudaizmo’’ disho a la radyo, Avner Shaley, direktor del Memoryal Yad Vashem el kual adjusto tambyen :’...esto provyene de una aktitud ekstremista i de una evidente voluntad de provokasyon’.
Shalom Yerouchalmi editoryalisto del diaryo Maariv, afirmo, el, ke nunka en el pasado la lucha entre los laikos i los relijyozos no ayego a un tal nivel de degradasyton >>.
El Deputado Nahman Shai del partido sentristo pensa de su parte, ke la utilizasyon del imajen de ‘un ninyo djudyo del Getho de Varsovia alevantando los brasos en sinyo de redisyon a las fuersas nazi’ es absolutamente intoleravle... ets...ets...
Alhad la prensa Israelyana kaji en su totalidad, rezervo su primera oja a fotografias de Haridim ke yevavan la Estrea Amaria sovre la vestimyenta rayada ke era el uniforme de los kampos de konsentrasyon.
Kual sea el nivel de esprito de demokrasia i de libertad de ekspresyon en İsrael “semejantes abuzos kontra la dinyidad del payis ke es el ultimo refujyo de un puevlo ke konosyo 2000 anyos de egzilyo, son intoleravles i inadmisivles”.
