La pedrita de dos personas de grande valor

Klara PERAHYA Judeo-Espanyol
14 Aralık 2011 Çarşamba

La kolektividad djudia de Estambol vyene de pedrer dos myembros muy presyozos ke se distingyeron syempre por sus noblesa de karakter i sus enormes servisyos komunitaryos.

Denise Benrey despues 2 anyos de grandes sufriensas i

Dr. Elie Behmoiras subitamente a la sigida de una embolia pulmonar. 

Dos amigos muy keridos, dos apoyos morales ke syempre mos mankaran terrivlemente.

Al empesijo pensi azer dos homenajes diferentes, ma presto me rendi kuento ke es kaji tekstualmente la mizma koza ke tenia a dezir por kada uno de entre eyos. Mizmo esprito humanitaryo, mizma noblesa i mizma profundura de refleksyon, komo tambyen mizmo kudyo por sus proksimos i mizmo dezeo de akudir, de konsolar i de abediguar.

Kada uno de entre eyos dos, savia oir lo ke dezia su interlokutor, kada uno de entre eyos dos se esforsava de entenderlo ...Personalmente los senti kaji syempre muy serka de mi. 

Denise Benrey kon su delikatesa natural savia meterse al nivel de kada uno. Sin azerlo sentir i sovre todo sin ostentasyon, eya savia dezir la palavra ke kalia dezir para realsar el moral i la “konfiansa en si” de kada persona kon la kuala eya se topava en kontakto.

Luzya, muy grasyoza, syempre impekavlemente vestida segun la sirkunstansya del momento, kuando entrava en una kamareta, era komo un rayo de luz ke penetrava kon eya...

Denise guadro esta dinyidad i este kudyo por su entorno mizmo en los dias los mas difisiles de su maldicha hazinura. Ay poko de esto, una amiga, (eya mizmo muy sufriente) me yamo para dezirme ke mizmo en el estado ande eya se topava, la defunda le avia telefonado para darle pasensya.

Denise mos ambezo a todos lo ke es la verdadera dinyidad, la dinyidad delantre la muerte.

Elie Behmoiras, el, kon su syensya medikal muy rika grasyas a su maraviyoza proksimidad moral kon el pasyente, kon su diagnostiko puedo dezir syempre djusto desde el primer dia i su devosyon enverso sus hazinos (poderozos komo nesesitozos), syempre pronto a responder a sus demandas, parvino a salvar de la muerte munchos de entre eyos, entre los kualos mi propyo marido Elie Perahya ke (tres anyos antes su fin inevitavle) el salvo de una muerte imminente grasyas a su senso kliniko muy huerte ke supo entrever mas leshos de lo ke era vizivle.

Personalmente en mi kualidad de vyeja lavoradora de la Matan Baseter i mas tadre (despues su kreasyon) del Barınyurt, me syento el dover de afirmar el kudyo kon el kual, el Dr. Elie Behmoiras se okupava grasyozamente de los numerozos hazinos ke le mandavamos i tambyen de los largos anyos ande el venia una o dos vezes la semana kontrolar la salud de los pansyonaryos.

Denise i Elie dezaparesyeron fizikamente de muestro derredor ma no de muestro korason i komo mo lo demando en su avla tan esmovyente Yofi Sedaka, ija de Michel Benrey, vamos guadrar de los dos, el rekuerdo de los momentos inolvidables de kayentor humana ke eyos mos izyeron konoser.

Ke sus almas repozen en la serenidad i la paz... sus nombres kedaran syempre eskritos en muestra memorya kon letras echas de lagrimas meskladas de rayos de luz.