La muerte de Beki L. Bahar desho munchos de sus amigos en la konsternasyon la mas profunda, i inevitavlemente en un estado de sorpreza amarga.
Muestra komunidad pedrio uno de sus myembros los mas valorozos, un myembro ke supo (kon su personalidad ansi ke kon sus ovras) realsar ainda mas el nivel intelektual de la kolektividad djudia de Estanbol.
Kon su potensyal de entendimyento i de avyertura humana a sus proksimos, eya fue un egzempyo a segir... Syempre aktiva i kreadora, syempre pronta a partisipar a la realizasyon de muevos proyektos, eya era una luchadera inkansavle kontra la inyoransa i la indiferensya.
Beki L. Behar era una intelektual muy apresyada al nivel Nasyonal, ke desho una ovra literarya bastante importante, munchos livros de poezias i de historya sovre sujetos antiguos Otomanos komo tambyen djudyos... poemas mayoritaryamente eskritos en lingua Turka ma tambyen en Djudeo-Espanyol, munchas pyesas de teatro ke azen parte de los repertuares de diferentes kompanyias teatrales i ke fueron prezentadas sovre diferentes shenas de muestra sivdad.
Eya obtuvo el premyo” Yunus Emre” i partisipo a multiples debates sovre diferentes temas sosyales i literaryos, syempre profunda en su razonamyento i klara en su elokusyon.
Eya era espesyalista de todo lo ke konserna “la Senyora Grasya Nasi” una de las mas selebres mujeres djudias de la Edad Medya.
Perfekta konsorte i madre de famiya, Beki fue una mujer eksepsyonal ke supo sovre todo guadrar syempre su simplisidad i su komprensyon enverso sus proksimos.
Todos los eskritores de la pajina Djudeo-Espanyol del Şalom prenzentamos a su famiya, ija, ijo, inyetos i serkanos, muestras kondolensas las mas sinseras i la ekspresyon de muestra profunda tristeza.
