Servan Schreiber muryo despues una larga lucha kontra un mal ke el supo dominar durante 20 anyos

Dr. David Servan Schreiber, psikyatro Fransez byen konosido, Shefe des del anyo 1997 asta 2OO1 de “la divizyon de psikyatria” en el hospital Shadyside del Sentro Medikal de la Universidad de Pittsburgh - USA, muryo Alhad a la edad de 50 anyos, a la sigida de una lucha inkansavle de 20 anyos, al nivel klasiko medikal komo tambyen personal, kontra una tumor malinya serebral ke se avia deklarado en el anyo 1990.

Klara PERAHYA Judeo-Espanyol
27 Temmuz 2011 Çarşamba

Invistigador infatigavle de una “Terapia Natural Ogzilarya” ke renforsa el efekto benefiko del sistema klasiko utulizado por la Medikeria aktual kontra el Kanser, el no pudo venser enteramente el mal, ma por kontra tuvo sovre el, una viktorya de 20 anyos de remisyon i de vida ke el konsakro a la bushkida syentifika.

Konsejo sinseramente a los lektores del ŞALOM de meldar sus dos ultimos livros sovre este maldicho mal, i si no tyenen la posivilidad de azerlo, de re-meldar la chika eskrita sovre el mizmo sujeto, la kuala fue publikada en la Revista “EL AMANESER” No.70 de Desembre 2010.