Aktos kriminales, horrivles en sus egzekusyon, portadores de una erensya de odyo i prejuisyos igualmente asasinos en sus esensya.
Vyernes pasado el 22 del mez de djulyo 2011, despues de medyo dia, kaji 600 myembros de la “seksyon de mansevos” del partido Sosyalisto Norvejyano se avian adjuntado en el payizaje idiliko de una chika isla ke se topa en medyo de un lako, para diskutir sovre el programa de lavoro del anyo a venir, kada uno kon un proyekto o una idea mueva en la kaversa, kada uno konvensido en su entuzyasmo, de pueder ayegar un dia a un mundo mijor, mas djusto i sovre todo mas humano…
“15-25 anyos” periodo de la vida ande todo parese posivle, ande se tyene delantre de si largos anyos de egzistensya i de posibilidad de aksyon... 15-25 anyos periodo de esperansa i de kredulidad.
Ma un suerte krual avia desidido otramente... Segun lo ke mos ambeza la prensa, vyernes pasado, en supito, en medyo de un interkambyo de ideas i de diskusyones, un ombre aedado a penas de 32 anyos demando la palavra, se la akordaron sin retisensya i el (kon grande sangre fria) sin ezitasyon, tenyendo en mano un arma a huego sofistikada, empeso a travar sovre los asistyentes sin vizar ken ke sea, a la syega, pushado por una irrezistivle voluntad asasina
La matansina kontinuo aste ke la Polisia del lugar pudo metrizarlo. Su arrestasyon no fue difisil, kaji sin rezistensya. El asumo kaji immedyatamente la responsabilidad de su akto... kontente al pareser de averlo perpetado.
Segun lo ke dizen varias gazetas, el plano fue aparejado minusyozamente, de sangre fria, desde el anyo 2009; se trata de un fundamentalisto katoliko, de aspirasyon muy serkana del programa del partido Novejyano ultra Nasyonalisto, gzenofobo, enemigo absoluto del multinasyonalizmo, ansi ke de kualkyer influensa o intervensyon ajena en su espasyo nasyonal.
Por seguro ke delantre la ley juridika, ansi ke delantre la sosyedad, es el, el prinsipal responsable. Ma detras de el, ay tambyen la enorme responsabilidad de una monstruoza ensenyansa del “odyo del otro” ke se topa a la baza de todo modo de teoria absolutista, la kuala pretende ser la sola a posedar la Verdad.
Detras de el, ay la influensa imperativa, de un respekto syego enverso kreensas transmetidas de jenerasyon a jenerasyon, munchas vezes eskritas en tekstos de un pasado leshano ke munchos meldan en sus literalidad sin a ningun momento tener el kudyo de bushkar en ke konteksto sosyo-historiko eyos fueron eskritos.
En ke kreensa ke sea, mizmo en la ke mos parese ser bazada sovre “una etika superyor o una ekuidad perfekta” el absolutizmo yeva en el, el premisyo de un impakto negativo, al kual pokos pueden rezistir... El perikolo se topa djustamente en este punto de fokalizasyon absoluta sovre una sola doktrina, sin la mas chika avyertura sovre otras valores....sin ningun kestyonamyento individual ni dubyo, komo un djenero de refuzo otomatiko de kualkyer otra solusyon.
