Si, komo todas las gazetas mo lo ambezan, una flotiya kompuesta de embarkasyones de varyos payizes Evropeos partyo verso Gaza para afirmar kon ostentasyon su solidaridad inkondisyonal enverso la populasyon konsiderada komo viktima del puevlo djudyo...
De mezmo, munchas personas partyeron individualmente por avion komo simples turistos kon la firme intisyon de protestar i manifestar sus sentimyentos pro-palestinyanos, al interyor mizmo de Israel, el kual byen entendido izo todo su posivle para arrestar estas markas intempestives de amistad enverso su enemigo.
Eyos pretenden azerlo por solidaridad humana enverso un puevlo desmamparado, medyo ambyerto i en perikolo, sin a ningun momento azer el mas chiko esforso afin de konoser la realidad otentika.
Es la razon por la kuala, kero formular personalmente unas kuantas kestyones a estos manifestantes:
Es ke eyos saven ke desde largos anyos ‘’el pretendido puevlo viktima de la rigor djudia’’ nyega formalmente el derecho a la egzistensya del puevlo djudyo Israelyano i ke se fikso komo eskopo de echarlo a la mar afin de eliminar por syempre su nombre de la karta jeografika de la rejyon?
Eske eyos saven ke ay de esto mas de 60 anyos, kuando a la sigida de la Shoah (afin de salvar el puevlo djudyo realmente persigido durante milenaryos por el odyo i el menospresyo), las Nasyones Unidas akseptaron la kreasyon de un refujyo otonomo sovre tyerras kaji dezyertas, kuvyertas de arena, ke no apartenian a ningunos partikolarmente, la totalidad de los Estados arabos del entorno, kada uno kon su armada, se koalizaron para destruirlo por syempre? Bendicho el Dyo sin ningun rezultado.
Es ke eyos se akodran ke otobuses Israelyanos yenos de siviles , espesyalmente de estudyantes i de ninyos, fueron los objetivos de asaltos terroristos de la parte de militantes del Hamas?
Es ke se olvidaron ke oy en dia, en munchas eskolas palestinyanas se ensenya a los elevos el aborresimyento i el menospresyo enverso el puevlo djudyo, ansi kel sakro dover de destruirlo por syempre?.
Israel no refuzo nunka de akudir kualkyer palestinyano en estado de grave peligro sanitaryo en sus propyos hospitales, los kualos son iguales a los mas sofistikados de los Estados Unidos o de la Evropa… Sus medikos salvaron numerozos ninyos de ke orijen ke fueran, kondenados, sin sus intervensyon, a una enfirmidad permanente o a una muerte prematurea…
A ningun ningun momento el sistema eskolaryo Israelyano inkulko a sus elevos el aborresimyento kontra los palestinyanos, ma solo la nesesidad absoluta de protejarsen i defender sus derechos a una vida sin espanto ni peligro insesante.
Ay grande probabilidad ke estos militantes (por la mas parte evropeos) ke van en grupo, gritando i repetando “semos todos palestinyanos”afin de afirmar sus apoyo moral a los ke eyos konsideran komo las viktimas de un blokus indjusto, lo azen al nombre de un pretendido humanizmo, ma eyos deven entender ke un reflekso de piadad gana su verdadera valor solo si repoza sovre faktos veridikos.
Es ke eyos protestaron kuando el soldado Igal Shalit de guardya sovre la tyerra de su propyo payis, fue arrevatado i enkarselado de una manera inhumana?
Eske eyos enaltesyeron la boz para reklamar ke a lo manko myembros de una asosyasyon karitativa internasyonal lo vijite?
Ande estavan eyos? i ande aktualmente estan eyos kuando proyektiles mortales fueron i son ainda echados a partir de Gaza sovre kazales Israelyanos i kuando aktos kriminales fueron i son perpetrados sovre los sitizanos djudyos,al nombre mizmo de Dyo?
Es bueno de saver i mizmo de syempre repetarlo: “El blokus de Gaza no konserno nunka el materyal vital indispensavle a la vida humana, komo por egzempyo: komanya , produktos sanitaryos o otros similaryos”. La prohibisyon se refera unikamente a todo modo de armas i a todo modo de materyal kon el kual se puede fabrikar armas.
El blokus de Gaza se refera a la nesesidad absoluta de sovreguardyar la seguridad del puevlo Israelyano i esto es el primer derecho komo tambyen el primer dover del Governo ke se topa a su kavesa.
Referandose a la flotiya de embarkasyones de los protestataryos, el primer Ministro İsraelyano Benyamin Netanyahu disho:
“İsrael tyene el derecho de intervenir kontra las tentativas de aparejar un terreno propisyo a la kontrabanda de misiles, roketas i armas sovre el territoryo mizmo de Gaza. Devemos repushar no solo los asaltos fizikos de muestros adversaryos, ma tambyen las atakes sovre muestro derecho a defendermos.
Kero agradeser los numerozos liders mundyales dirijidos por los Estados Unidos i los Evropeos, el Sekretaryo Jeneral de la ONU i mi amigo el primer Ministro Grego George Papandréou, los kualos avlaron i intervinyeron serka de la Flotiya de la Provokasyon”.
