La vida

Kualo es la vida?

La vida no es el nombre de amigos ke tenemos.

No es azer planos para la fin de semana.

Şeli GAON Judeo-Espanyol
6 Temmuz 2011 Çarşamba

No es tener un amante.

No es la rikeza de muestra famiya.

No es las eskolas ande estudyimos.

No es la ermozura, u lo ke mos vistimos.

No es las notas ke tomimos en los egzamenes.

No es la entelijensya, no es el selo, no es azer maldad al den frente.

“La Vida” es; el kerer byen al den frente. Es azer orozo al entorno, a la famiya, keridos, amigos i aliados (dost).

Es avlar bueno, kitar bueno de la boka, i no djuzgar (yargılamak) al den frente.

Es transportar (taşımak) la kerensya de aryento el korason, engrandeser esta kerensya i distribuirla (dağıtmak).

Ma lo mas emportante es; azer una koza ke no puedemos realizarlo solos, ma kreyar un evenemento kon la ayuda de otros, i influensar (etkilemek) el korason del den frente. 

La vida es el apoyo ke das a tus keridos, es venser el selo, i ser komo si mizmo.

La vida es la konfiensa, la felisidad, i la afeksyon.

La vida es un arte de desinar, sin utilizar la goma

Kualo estamos asperando? Kualo mos esta ofriendo la vida?

En primero de todo kale ser konsyente (farkında olmak) de todo. Ke mos estamos puedyendo espertar la demanyana, pueder komer, tomar reflo, ver, pueder kaminar, oyir, esto todo es un miraklo.

Kale ke mos apersivimos de la golor de las rozas, de las vedruras despues de la luvya, i de munchas otras kozas.

Ser orozos de estar toda la famiya endjuntos en el entorno de una meza, todos sanoz i rezyos.

Las problemas son para las personas. No ay vida sin problema. No kale solamente dezear, rogar. Kale ke mos alevantemos en pyes, entender las verdades, i akseptar todo komo es.

Deves en kuando lo ke savemos, lo ke mos ambezamos mos dan una dolor. Kale bivir i la dolor para pueder apartar las maraviyas ke estamos bivyendo kadal dia.

En primero de todo kale ke pensemos a muestro puerpo, a muestra alma (ruh), a muestro meoyo (akıl). 

Todos somos personas, siguramente ke tenemos flakuras (zayıflık), i eskaimyentos. Devemos de konfrontarmos (yüzleşmek) kon los espantos (korku) ke tenemos.  Kale kreer a la fuersa ke vyene de aryento.

No kale rezistir a dingunos.

La kapachitad es; de konsintirse de la ermozura del momento ke estamos bivyendo.

Por egzempyo; el tyempo ya se kayento, i ya se puede dizir ke el enverano ya vino.

El enverano es una sezon ke se bive kon muncho gusto i alegriya despues de la primavera. Los dias se alargan, las noches se akurtan, la natura es yena de kolores diferentes. Se oye kantar los pasharos,  las yervas  se engrandesen, las flores enfloresen en los kampos i las personas se syenten mas orozos de todo modo de evenemento, munchos se van a las islas, otros viajan i los ke kedan en la sivdad se van a la mar, a las kayes.

El enverano arekayenta la persona. La kolor de las vedruras i del syelo, la mar alegran a la persona i se deviene mas pozitivos i mas optimistos.

Apersivirmos de esto todo es una grande kalitad.

Bivir en enverano en la isla es un grande privilejyo para las personas.

Demanyana dar un torniko en el bodre de la mar entre los arvoles de pino, iyir a peshkar, kemar el ogar para asar las karnes, entrar a la mar es un divertimyento grande. Tomar savor, profitar de la mas chika koza es bivir la vida yena. 

Antes dos semanas el kal de Burgaz se avyo kon grande eskarinyo i alegriya.

Ke ermozura de adjuntarmos kon todas las karas konosidas!...., kon unos kuantos mankos malorozamente.

La Sinagoga de Burgaz tyene un lugar emportante i espesyal entre los yahides. Todos son komo una famiya. Despues de la orasyon de shabat, la seuda i el adjuntamyento ke ay aya, las konversasyones tyenen una savor a parte.

El ayre en el bodre de la mar, los arvoles de pino, la natura repozan a la persona i dan una trankilitad entre las bozes dulses de los pasharos ke se mesklan kon la boz del chuflete de los vapores ke akostan kada una ora. Para alesharmos de las problemas de la vida, i pasar un shabat i alhad en un kazal komo Burgaz, es una shans grande para mozotros. Alevantar temprano i ver el nasimyento del dia, la kolor kolorada del sol, aunarmos kon los keridos, es una shena de kada empisijo de enverano.

Dar loores ke estamos puedyendo azer esto todo, esta enaltesyendo la enerjiya de la persona, en aminguando la kanserya. 

La felisitad es en primero la sanedad. El enverano es una sezon ke traye la felisitad i el entuzyasmo de bivir.

Kale apersivirmos de las kozas ke tenemos en muestro doredor komo los guesmos de las flores, de la tyerra, las personas ke mos keren byen, i otras kozas.

Biviremos el momento (anı yaşamak), porke la vida es solo este momento.