El poder i la fuersa sometidos a los imperativos de la djustisya Konformandose a la desizyon de la djustisya de su payis, la armada Israelyana elimino los 3,2 kilometros de alambre (tel) ke avia prealablemente metido delantre el kazal de Bilini. Los Palestinyanos puedran ansi rekuperar 55 hektares de tyerra.
De esta manera, la barrera de seguridad ke fue un tyempo konsiderada komo “pared de apartheid” sera aleshada del kazal Palestinyano i aserkada de la kolonia Israelyana vezina.
La djustisya..la djustisya …la segiras.
Premyos i mensyones a jovenes, estudyantes del UÖML
Paralelmente al Konkorso anual de literatura “Gila Kohen”, la gazeta ŞALOM Organiza tambyen desdel anyo 2009 un konkorso de los mijores tekstos eskritos por los jovenes del Liseo Djudyo “Ulus Özel Musevi Lisesi”.
Ansi, este anyo: El primer premyo fue atribuido a Suzy Asa por su eskrita entitolada “Altinci Adam”. El segundo a Romina Özşardaş por su kuento “Kalp Tık-Takları”.
El treser a Ceysi Kazado por su istorya ”Kusursuz aşk”. De mezmo mensyones de apresyasyon fueron distribuidas a munchos otros estudyantes de valor.
Un futuro klaro i mizmo briyante se avre delantre la manseves de muestra Komunidad, ansi sea syempre.
Un muy ermozo artikolo sovre el sistema de governansa de la Turkia
Rekomendo a los lektores frankofonos de muestra gazeta “el editoryal de Claude İmbert” publikado en la revista “Le Point” sovre la Turkia i la kualidad de su governansa, ke puedesh topar sovre vuestro ordinador, mezo Google, sovre el sito elektroniko “Lepoint.fr”.
