Ande ke vayamos, ande ke mos refujyemos, temprano o tadre, las sembulturas de muestras
aksyones kumplidas, komo tambyen la de las ke no tuvimos el koraje de azer, mos persigen, solombras kayadas enganchadas a kada uno de muestros pasos...
La semana pasada muestro grande amigo Jean Carasso, fundador i shefe redaktor de la revista “La lettre Sepharade” ke desfortunadamente kedo de apareser falta de kolavorador pronto a partajar la karga administrativa de publikasyon, me mando la kopya de un e-mail ke el mizmo venia de resivir.
Esta eskrita trata ainda oy, despues kaji 60 anyos, de la falta de koraje siviko de la kompanyia de trenos fransezes, la kuala sin ninguna rezistensya aksepto de transportar miles i miles de deportados djudyos a los kampos de la muerte.
Des del anyo 1941 asta el mez de agosto 1944, sovre la demanda del okupante nazi, la Direksyon de la kompanyia ferrovyera franseza organizo la deportasyon de 76.000 djudyos, entre los kualos 11.000 ninyos.
Nunka, ningun konvoy fue detenido o retardado en su enkaminamyento verso la muerte, salvo un solo konduktor tuvo el koraje de refuzar de konduzir un semejante konvoy. Su nombre era “Leon Bronchard” (de bendicha memorya). Su akto fue saludado por sus kolegas ma eyos no izyeron nada, a sus torno, para arrestar o retardar el transporto de la triste karga.
Leon Bronchard, el, fue arrondjado de su echo, lo ke lo pusho a partisipar a un movemyento de rezistensya, ma poko despues fue apanyado i deportado en uno de los terrivles kampos de konsentrasyon.
Devemos notar (dize el teksto ke Jean Carasso me mando) ke un otro treno de deportados fue tambyen arrestado en Bekjika de la parte de tres rezistyentes. Komo sola arma eyos tenian un chiko pistol ke les permetyo de forsar los kadenados de unos kuantos vagones i de salvar 243 personas sovre 1200 ke kontenia el konvoy.
Los dos egzempyos provan ke era posivle de intervenir kon o sin sukseso.Ansi la kompanyia ferrovyera Franseza kedo manchada de esta falta de solidaridad sivika i ainda oy se lo reproshan.
Una kestyon mos vyene al tino. Es ke la “no-asistensya” a personas en perikolo konstitue la mizma responsabilidad kel fakto de perpetrar si mizmo el krimen? Por seguro no. Eya provyene de un sentimyento de indiferensya, o munchas vezes de una syerta kobardia (korkaklik), lo ke es tambyen, al nivel humano, bastante grave.
En este ultimo kavzo, kale tomar en kuento munchos faktores: “el chaos ande se topava el mundo en este periodo de kaji dezumanizasyon”, “el instinkto de konservasyon i ansi el espanto de kada uno por su propya vida”, i puede ser “la imposibilidad mental de realizar en su total dimensyon la horor de la destinasyon final de estos trenos.”
I agora una otra kestyon: “Es ke se puede perdonar a los ke no supyeron trespasar sus espanto al reziko de sus vida?”, “Es ke esta mankansa de asistensya afin de ralentir el movemyento de deportasyon (en un konteksto de amenaza i de peligro jeneral) puede ser konsiderada komo una partisipasyon pasiva al krimen?.
Munchas vezes me demando de mi para mi, lo ke yo personalmente iva azer en una semejante sirkunstansya?...Nunka pude responder de una manera kategorika...
Unos kuantos anyos despues la fin de la guerre , un gazetero avia demandado a Vladimit Jankelevich si un dia el puedra perdonar al puevlo Alman...despues de un largo momento de refleksyon, el grande pensador djudyo respondyo:”Miz ijos, probablemente “Sİ”.
Yo? no se ... ma nunka, nunka a Heideger.
Antes de la gerra, Yankelevich era uno de los dishiplos los mas fideles del grande filozofo Alman por el kual el sentia una devosyon ilimitada.
Mas grande es el kulpante, mas grave es su kulpa.