Dos ermozas bodas de Turkanos en Israel:
Lisya Saylağ ija de muestra valoroza kolavoradora Tuna & Albert Saylağ, adjunto su destino al de Eytan Malki, ijo de Solanj Malki, para largos i largos anyos de felisidad i de kerensya resiproka.
De mezmo, alhad el 5 del mes koryente Lora ija de Lucette Benezra & Leon Koen-Hemsi i Eytan ijo de muestros presyozos amigos Lina & Robert Filiba byen konosidos por la valor de sus partisipasyon a la aktividad de muestra Komunidad , aunaron sus vidas para un ermozo futuro yeno de amor i komprensyon mutual.
Alegria, armonia i prosperidad a los kuatro ... el Dyo ke bendiga estas Unyones .
***
Un muy interesante kolokyo:
Grasyas a la hospitalidad de Nora Şeni direktora del “Instituto Fransez de Estudyos Anatolyanos”, Martes i Myerkoles pasado, la direktora de muestro Sentro Judeo-Espanyol “Karen Şarhon” i el Antrepologo “Mahir Saul” profesor en la “Illinois University”, organizaron un simpozyum sovre la lingua i la kultura sefardi.
Muestra amiga Coya Delevi (sana ke este) vos da al empesijo de esta pajina, el relato de la primerta sesyon ke fue de un interes partikular.
No pude personalmente asistir a la avyertura, por kavza de partensya, el mizmo dia, de mis ijos instalados en los Estados Unidos. Por kontra Esti Saul, Şeli Gaon i yo estuvimos prezentes el segundo dia.
Avia relativamente poka djente, lo ke mos permetyo (profesores i simples eskritores del “Şalom” i del “Amaneser”) de tener una muy interesante diskusyon todos endjuntos. Se avlo sovre las palavras ajenas turkas, ebreas, fransezas , italyanas, portugezas i otras... elementos muy presyozos ke se adjuntaron al bagaje lenguistiko de muestros leshanos antepasados i permetyeron su evolusyon todo en deshando trasas historikas de sus enkaminamyentos despues sus deportasyon de Espanya.
Se diskutyo tambyen sovre los arkaizmos i en mizmo tyempo los neolojizmos ke egzisten en muestra avla i de las palavras espanyolas ke pyedreron sus sinyifikasyon inisyal ... Fue una dia muy interesante i muy riko en muevos puntos de vista, lo ke mos enrikesyo muncho intelektualmente. Ay muncho mas de kontar sovre este segundo dia, ma el espasyo nesesaryo mos falta en esta unika oja konsakrada a muestra lingua ansestral.
