(Lunes)Me ekskuzo de revenir sovre el mizmo sujeto ke la semana pasada, ma el misteryo ainda persiste. Es syempre la mizma inkulpasyon sin rekonoserle la mas chika sirkunstansya atenuante de la parte de la djustisya Amerikana, i delantre este akoso ininterrumpido kaji krual, el prezumido kulpavle afirma kon la mizma firmeza “No so kulpavle”.
Desde mas de dyes dias, la Prensa oksidental, partikularmente la franseza i tambyen kon la mizma insistensya la Amerikana, no kedan de revenir sovre el kavzo Dominique Strauss Kahn ke devino kaji un tema rekurente asta la obsesyon.... La kontroversya es munchas vezes dura entre las dos partes del Oseano Atlantiko, las opinyones diferentes i mizmo kontraryas entre las dos “Prensas”, kada una konvensida de la verasidad de lo ke eya dize, sin a nigun momento toparse delantre una kualkyer prova realmente akuzatrisa o byen diskulpante.
El kavzo Strauss Kahn trespaso desde el primer dia las limites personales para devinir (partikularmente en el espasyo medyatiko) un kavzo kaji de interes jeneral.
Un mizmo insesante kambyo de reproshes resiprokas entre las gazetas Amerikanas i las Fransezas: Los myembros de las de los Estados Unidos, eksesivamente severos, keshandosen del laksizmo de sus homologos fransezes, los kualos durante lungos anyos kedaron kayados delantre los simptomes de una seksualidad desbordante de la parte del ex prezidente del FMI, prontos en la impetuozidad de sus kritika a destruir por syempre la vida de un ombre sin ainda (lo repeto) tener en mano verdaderos indisyos de kulpabilidad; i esto en favor de un feminizmo absoluto, de una importansa krusyal para eyos, lo todo mesklado al eternal puritanizmo anglo sakson.
Los de la segunda prensa (los fransezes) son mas induljentes i sovre todo mas respektuozos de la vida privada de kualkyer individuo tanto ke no egziste provas palpavles ke atestan su kulpabilidad.
En komparasyon kon la Amerikana, la prensa Franseza fue de todo tyempo manko obsedada por temas pudibundos, manko pronta a estudyar sistematikamente las pulsyones seksuales de un ombre kual ke sea, las kualas pueden diferar entre los individuos.
Muestra kestyon es diferente “Eske Dominique Strauss Kahn agreso realmente, Si o No”? El syempre kontinua a afirmar su inosensya; el lo izo mizmo en su letra de demisyon al F.M.I., letra de la kuala vos do la traduksyon debasho estas linyas:
“Es kon una immensa tristeza ke oy me syento ovligado de propozar al Konsilyo de Administrasyon mi demisyon del posto de direktor jeneral del FMİ.
En este moment, penso en primero a mi mujer ke amo mas ke todo, a mis ijos, a mi famiya, a mis amigos.
Penso tambyen a mis kolaboradores del FMI kon los kualos kumplimos tan grandes kozas desde mas de tres anyos.
A todos kero dezir ke refuzo kon la mas grande firmeza todo lo ke me es reproshado.
Kero prezervar esta Institusyon ke servi kon honor i abnegasyon i sovre todo kero konsakrar todas mis fuersas, todo mi tyempo i toda mi enerjia a demostrar mi inosensya.”
En su simplesidad mizma, esta letra me emosyono profundamente i no me puedo detenerme de demandarme kontinualmemte “deke esta inkulpasyon infleksivle, este akoso kontinual”? “deke este shifro egzorbitante de “setenta i kuatro (74) anyos de enkarselamyento posivle” ke sirkula en la prensa en kavzo de kondenasyon definitiva?”. Es ke este shifro es la suma de penalidades por la akumulasyon de prezumidos semejantes aktos antesedantes? Si estas alegasyones eran konformes a la realidad, deke las mujeres ke pretenden aver sido agresadas no lo deklararon immedyatamente? deke asperaron anyos i anyos para azerlo? ke valor judisyal puede tener semejantes akuzasyones?
Olas de envidya i selo paresen soplar kontra el ex- prezidente del FMİ, kuala puede ser la razon? Su karera dramatikamente interrumpida fue inkontestavlemente briyante. Un grande partisipante de orijen Ejipsyano del Fundo Monetaryo İnternasyonal disho:
“Tres anyos antes esta Institusyon estava en estado de kompleta regresyon i es grasyas a la syensya i a la kapasidad de Strauss Kahn ke eya pudo ayegar a su estado aktual”. Un otro (esta vez un profesor fransez de universidad) deklaro ke “en desparte de la eksepsyonal dimensyon operasyonal kel prezidente salyente dyo (en este periodo de kriza universal) a la grande İnstitusyon, el tambyen la humanizo.”
Lunez, meldimos en la prensa franseza ke en una entrevista ke el akordo a un djornalisto de la gazeta Haaretz, el avokato Amerikano Benjamin Brafman uno de los mas grandes penalistos Amerikanos, uno tambyen de los dos defensores ke asumyeron el procheso del eks- Prezidente del FMİ, disho:
“Dominique Strauss Kahn va deklararse no-kulpavle i a la fin sera absolvido. Byen entendido nada es absolutamente seguro, ma segun lo ke veyo i diserno en la enkuesta, el sera absolvido. El me impresyono muncho; malgrado las sirkunstansyas, el esta muy byen rezistyendo”.
Los dias avlaran.
