“Los ijos de Israel, kedaron 430 anyos en Misraim. En el diya final de estos 430 anyos, todas las Armadas de D. salyeron de la tyerra de Misraim.” “Esta noche (de Pesah) es la noche de guardiya para D. al salir de Bnei-Israel, de las tyerras de Misraim. Es la Noche de D., i todos los ijos de Israel seyan guardiyanos de jenerasyon, en jenerasyon..”(Shemot- Kap.12-V.41-42)
“...a layla a ze, mi kol a leilot?” Kuanto fue demudada (estranya) la noche la esta, mas ke todas las noches?...La repuesta la meldamos en kada SEDER, en la Hagada de Pesah, fyesta de los prodigos (mucizeler) de D.en favor del puevlo Djudio. Pensi transmeter propozitos de otoridades relijyozas, sovre Pesah i el mez de Nissan, ampesando kon el Grand Rabbino Moshe M. Levy. Linyas tomadas de la revista “Los Muestros” antes unos, kuantos anyos:
“Los doktores de la Ley komentan ke noche de Pesah, D., en toda su mizerikordiya (rahmet, merhamet), velava (tener kudyo) pormodo ke el “Satan”destruidor no se interpoze (araya girmek) para impedir los ijos de Israel de liberarsen del esklavaje de Ejipto, ande eyos eran detenidos komo prenda por Paro, ke no konosyo los grandes servisyos rendidos por Yosef Hatzadik a Misraim... Pesah es la realizasyon de la promesa Divina ke mos guadro... La promesa ke sostuvo (desteklemek) muestros padres en los momentos trajikos...”(fin de sitasyon)
No selebrar el “Seder” es no konoser la valor permanante de los prinsipyos de la “TORA” ke mos azen preguntar: “Ma Nishtana?” La libertad ke Bnei-Israel gano, salvandose del esklavaje, le izo achetar tambyen, un “YUGO” (boyunduruk), una sumisyon (itaat) a syertas ovligasyones. Por mas mijor entender, kero prezentar aki, los propozitos de Rabbi Wein (Jerusalem Post 2006) ke tresladi:
“...El mez de Adar es prezentado al puevlo Djudio, komo “Marbin Besimha” (pujar la alegriya). Esto se entyende, syendo ke en este mez selebramos PURIM, muestra delivrensa de la total destruksyon ke planeava el maldicho Aman... Eskapar de una eksterminasyon nasyonal syendo una razon de alegriya, el mez de Nissan deve ser para el puevlo “Marbin Besimha”. Nissan, kon la grande fyesta de Pesah, es sin dubyo, la mas komemorativa perioda del kalendaryo Ebreo. Ma, en la deskripsyon de las fyestas de la anyada djudia, en muestras orasyones, Pesah es referado komo ”Zman Sheirateynu”. Kere dezir: el momento de muestra delivrensa (kurtuluş) i de libertad.”(fin de sitasyon)
Ay una diferensya esensyal en el grado de alegriya, entre las fyestas Purim i Pesah. Tambyen, las dos fyestas son de djeneros diferentes. En Purim, ay una egzaltasyon, en komemorando la desfecha de Aman. Lo ke permete una alegriya kaji inkontrolavle, bayles, karnavales i kostumes...Sintiremos de muevo al Rabbi Wein:
“... En la vida djudia, la delivrensa a la libertad komporta ovligasyones, implika responsabilidades, vizyon i sakrifisyo. En Pesah, no mos deshamos a la alegriya egzuberante (coşkulu) de Purim. En Pesah, ay el reselo del “hamets”, las restriksyones (sınırlama) de “Yom Tov”. Realizamos ke la verdadera libertad demanda una grande dishiplina, un sensyo de entendimyento, lo ke marka la alegriya de Nissan i de Pesah. Una alegriya ke portanto demanda preparasyon i pensamyento...” (fin de sitasyon)
Son estos pensamyentos ke mos ovligan a pozarmos syertas preguntas. I, en una mezura, mos azen revenir al kamino si mos aleshimos i azer teshuva. En el kalendaryo Ebraiko, Adar i Nissan, Purim i Pesah, estan uno detras de otro. La alegriya kalma en la selebrasyon de Pesah, es komo la kompensasyon (telafi etme) de la alegriya sin mezura de Purim. Pesah es el verdadero konsepto de la alegriya djudia, la deskripsyon kontinual de muestra libertad. En este espirito, arresiveremos el mez de Nissan, kon la Primavera i la fyesta de Pesah. Otruna vez vamos a demandar: “Ma Nishtana?”, i en la mezura del posivle, vamos a dar eksplikasyones a muestros chikos...
HAG SAMEAH-MOADIM LESIMHA.
