Es ke un Governo de Unyon Nasyonal es posivle en Israel?

Klara PERAHYA Judeo-Espanyol
6 Nisan 2011 Çarşamba

Segun lo ke meldi en el “Jerusalempost elektroniko en Fransez”, en el korso de una reunyon kon el primer Ministro Netanyahu, Tzipi Livni shefe de la opozisyon Israelyana deklaro el menester imperyozo de retornar a la meza de negosyasyones afin de meter fin al konflikto entre Israel i el Estado Palestinyano.

“En este objetivo puedemos lavorar endjuntos komo dos partenaryos” (disho la anteryor primera ministra al aktual shefe del Governo Israelyano).

 Eya avlo tambyen de su vizyon de un Estado Hebreo: “Ay los ke pensan ke un Estado Djudyo nesesita una mayoria djudia. Yo digo ke es nesesaryo ma no sufizyente... para mi, un Estado Djudyo es una tyerra de arresivo para el puevlo Djudyo, una sosyedad Djudia fundada sovre proyektos nasyonales egzekutidos todos endjuntos , proyektos ke tendran komo baza “muestra Historya”, “muestra Kultura” i” muestras Tradisyones komunes...”

Es ke estas dos personalidades huertes, kada una byen determinada en su vizyon personal de la situasyon prezente, puedran lavorar endjuntos? ... todos los dos son otoritaryos, konvensidos de la verasidad de su propyo punto de vista i de la djusteza de sus objetivos.

Es ke van a tener el koraje de luchar en komun i de salir, kada uno, de su sola manera de pensar? Ninguna idea a eya sola puede kontener la verdad en su totalidad, ma a eyos dos “Livni i Netanyahu” individuos de vizyon diferente ma de objetivo komun, azeran el mijor ekipo posivle, a kondisyon ke kada uno de entre eyos tome en konsiderasyon el argumento del otro.