Es ke Israel sera enfin reabilidado de la akuzasyon de krimen de gerra?

Klara PERAHYA Judeo-Espanyol
6 Nisan 2011 Çarşamba

Segun lo ke mos ambezan la Prensa Israelyana ansi ke syertas gazetas Fransezas, en un artikolo publikado Shabat pasado el 2/4/2011 en el Washington Post, el djuzgo Sud-Afrikano Richard Goldstone (ke avia sido, en el anyo 2009, kargado por la ONU de azer una enkuesta sovre la gerra Israelyana en Gaza) deklaro ke su raporto de akeya epoka akuzando İsrael de krimen de gerra, seria diferente si el era eskrito oy en dia.

Richard Goldstone ekspliko ke Israel refuzando de kolaborar kon la komisyon de la ONU, es por falta de kualkyer otra eksplikasyon, ke en su raporto de 2009, “los atakos Israelyanos ke avian kavzado la muerte de siviles Palestinyanos” fueron konsiderados komo “asaltos intensyonales”. “Si savia lo ke se oy, el raporto iva ser diferente” fue la konkluzyon del djuzgo Sud-Afrikano..

Ekstranya manera de avaluar el kavzo, de la parte de un djuzgo responsable de una enkuesta de esta importansa, ekstranyo veredikto kontra Israel sin analizar al fondo la situasyon ni oir kon el mizmo esforso de imparsyalidad los argumentos de las dos partes.

El prezidente Shimon Peres demanda aktualmente ekskuzas ofisyales de la parte de Goldstone.

El primer Ministro Binyamin Netanyahu egzije, el, la annulasyon immedyata del raporto en kestyon. Sus palavras hueron: “Demando a la ONU de annular immedyatamente el raporto Goldstone”.

No mos olvidaremos ke este raporto kavzo un danyo terrivle a Israel i fue a la baza de munchos malentendidos i insidentes diplomatikos muy regretavles. En todo kavzo los argumentos del djuzgo Sud Afrikano, eksplikando la razon de su error, paresen ser sin konsistensya. Desde el primer dia, las Otoridades Israelyanas ya avian deklarado ke se tratava de una gerra de auto-defensya a la sigida de los insesantes tiros de Gaza sovre diferentes sivdades Israelyanas, lo ke metia en perikolo de muerte los moradores de estos lugares.

Me permeto a este sujeto, de evokar ke en data del mez de Novembre 2009, en esta mizma pajina, aviamos transmetido a muestros lektores “el Kontra-raporto” publikado por Richard Kemp (anteryor Komandante de las Fuersas Britanikas en Afghanistan), el kual diskulpo la armada Israelyano i afirmo ke eya izo todo lo ke era posivle de azer afin de salvaguardar la vida de los siviles.

Vos transmeto debasho estas linyas chikos pasajes del dicho “Kontra – raporto” del komandante Britaniko:

(traduksyon tekstual)

Sovre baza de mis konosensyas i de mi eksperyensa, puedo dezir lo sigyente: “En el korso de la Operasyon “Rio de Plomo”, la Armada de Defensa de Israel izo muncho mas ke kualkyer otra armada en la Historya, para salvaguadrar los derechos de los siviles ke se topavan en zona de kombate.

Israel lo izo, alora ke afrontava un enemigo ke metia voluntaryamente sus fuersas militaryas detras el eskudo humano kompuesto de la populasyon sivil (...) La verdad es ke la Armada de Israel izo todo lo ke es posivle para sinyalar a los siviles de Gaza los lugares ke ivan ser bombardados, en echando prealablemente miles i miles de “avizos” i en establesyendo mas de 100.000 komunikasyones telefonikas (...) Mas ke kuala otra koza, las pedritas siviles (en Gaza) fueron la konsekuensa de la manera de kombatir del Hamas. El Hamas kijo voluntaryamente sakrifikar siviles”

Riko de una grande eksperyensa humana, el komandante Britaniko “Richard Kemp” supo immedyatamente evaluar la situasyon en su realidad kompleta, ma malorozamente no fue muy oyido de la parte de la Grande Institusyon Mundyal ke portanto tyene komo karga mayor de asegurar una ekidad absoluta konsernando los litijyos inter- politikos.