Habib Gerez

Şeli GAON Judeo-Espanyol
30 Mart 2011 Çarşamba

El pintor, poeto i el eskrivano famozo de muestra komunitad.

La semana ultima tuve la okazyon de vijitar el grande artisto “Habib Gerez”, en su kaza ke la formo komo un museo. En la entrada de su kaza, pasimos de un kortijo estrecho ande aviya en las dos partes statuas, pinturas i fotografiyas de kolores diferentes.

El artisto Gerez izo 120 ekspozisyones personales, ke los trenta fueron en paises etranjeros. Gano 63 premyos (ödül) de las kompetisyones (yarışma) ke partisipo.

Sus ovras estan ekspozadas en los museos de “Arsonval” en la Fransya, de “Herstal” en la Belgia, en el museo de “Judah Magnes” en los Estados Unidos, i en el museo de “Ben Ari” en İsrael.

En 1998 el gano el “Grande Premyo de la Evropa” (Avrupa Büyük Ödülü) a kavza de sus aktivitades de 50 anyos en el arte.

Tyene 11 livros de poemas ke publiko i una partida de sus poemas se traduiso en diferentes linguas etranjeras.

El eskrivyo mas de 600 artikolos en diferentes jurnales i revistas.

Habib Gerez es konosido en la Turkiya, komo el artisto ke gano el mas muncho premyo de todos los otros i el mas modesto.

En lo ke soni la puerta i la avyo, lo ke me dyo en ojo fue su sonriza (tebessüm) kon la risivida kayente.

El arte es su pasyon.

Una kaza de tres etajes yeno de statuas, bibliotekas, livros, kartas, jurnales, revistas i una archiva de 40 volumes (cilt).

Lo ke eskrivyeron por el en la prensa (basın), esta guadrado en la archiva de 40 volumes.

En la vitrina tyene los premyos ke gano; medalyas, kupas i platas.

En el museo se topa 102 tablos.

En el enterval de 60 anyos, el izo; 10.000 tablos i tyene la inskripsyon (kayıt) de los 6.000 tablos

En el depo de su kaza tyene 3.400 tablos.

En vijitando su kaza, el dyo a entender ke sus tablos teniyan kuatro periodas (dönem)

1- La perioda ande izo pinturas;kon el arte de Ebru (ebru sanatı),

2- La perioda figurativa donde izo tablos de natura morte.

3- La  perioda abstrakta (soyut).

4- La perioda impresyonista.

Avlar kon el es un plazer, la persona no se rendye kuento de las oras ke pasan komo la agua ke korre.

El disho ke: “El perfeksyonizmo (mükemmellik) es una evolusyon (evrim) ke no tyene fin.

Todos deven de okuparsen de una partida de la sensya (bilim) i del arte (sanat) para pueder alkansar al perfeksyonizmo en diferentes puntos de vistas kon muncho esforso.”

“El lavoro sin eskansarse, kon una disiplina i un orden, kon seryozitad i kon muncho dinamizmo kreye (yaratmak) muevas deskuvyertas (buluş) en sus ovras”. Las kolores bivas en sus ovras una mas diferente  de la otra, mos azen sintir los muevos orizontes (ufuk), los penseryos i sus sentimyentos.

La dimensyon (boyut) en sus pinturas es yeno de kerensya i de amor. En sus tablos de panoramas, de peizajes puedemos ver sus sentimyentos kon la ayuda de la spatul i las kolores ke utilizo.

El puede transferar (aktarmak) a la superfisiya de la pintura lo ke tyene en su meoyo.

El artisto utiliza syempre diferentes materyales para pueder kreyar diferentes sujetos en sus pinturas, poesias i eskritas.

Para Habib Gerez, el arte es una egzajerasyon (abartı). Puedemos ver en sus pinturas la natura empresyonista kon el lavoro konkreto (somut), i abstrakto (soyut). En estos lavoros el artisto reushido H.Gerez  aze el komentaryo de la natura kon la vida.

La pintura i la poesia kaminan endjuntos. Todas las seksyones del arte estan en raporto unos kon los otros. Su penseryo es; ke el arte kon la sensya (bilim) estan en una armoniya. El disho ke;

 “Kuando miramos a la natura, vemos munchas kolores. Las kolores de la mar, del syelo, de los arvoles, de las flores, de las frutas i esto todo mos plaze i mos influensa. El orijen del arte es la natura.

El artisto aze el komentaryo (yorum) de la natura i entremientes el adjusta a su ovra, sus sentimyentos i sus penseryos.

En la pintura ay menester de tres talentos.

El primer es la mano.

El sigundo es el ojo i el treser es el meoyo ke ekspresa la kultura. Kuando estos tres talentos (yetenek) se adjuntan, el arte de la pintura enflorese.

Kada dia tengo una koza mueva de ambezarme.

El sekreto de la reushitad es lavorar muncho, i no peryer el tyempo.”

Habib Gerez es el reprezantante de la Turkiya, en la Akademiya de la Evropa.

El eskojyo el arte; komo un modo de vida.

Kerido Gerez; te oguro syempre sukseso en tus ovras i vida larga kon sanedad.