Apoyo a ‘la revolta de una partida del puevlo Libyano’

Klara PERAHYA Judeo-Espanyol
23 Mart 2011 Çarşamba

Shabat la tadre, despues de una larga refleksyon i de munchas intervensyones serka de las “Fuersas Governomentales de la Libia” demandandoles de respektar “los derechos ansi ke las aspirasyones a la demokrasia” de una grande partida del puevlo libyano ... despues tambyen de aver diskutido largamente i obtenido el konsensus kaji unanimo de los myembros de la Organizasyon de Nasyones Unidas “Onu” (salvo syertas abstensyones, ma ningun veto), i sovre todo kon el akordo del Mundo Arabo, los primeros aeroplanes Fransezes atakaron varyos objektivos militaryos de Khadafi i los Estados Unidos komo la İnglitera intervinyeron syempre en el mizmo eskopo, a partir de Naves de Gerra ke se topan en el derredor.

No savemos lo ke sera la konkluzyon de esta intervensyon ... sea kual sea su rezultado, eya konstitue un primer djesto de ayudo del mundo eksteryor al puevlo Libyano oprimido en su aspirasyon a la libertad .

Si pensamos profundamente, esta intervensyon (ke puede pareser insolita a syertas personas) es, en realidad, una manifestasyon aktiva de solidaridad enverso los puevlos ke luchan munchas vezes las manos kaji desnudas, por mas djustisya i mas igualidad.

No se trata de una injerensya militarya en un payis otonomo, ma de un simple akto de humanizmo ke se refera a la Deklarasyon de los Derechos del Ombre i ke responde al artikolo 1973 de la konstitusyon de la “O.N.U”.

Ningun soldado Fransez, İnglez, Amerikano o de kualkyer otro payis no va meter pye sovre la tyerra Libyana, ma por kontra todos los objektivos ke permeten de oprimir una partida del puevlo (komo aeroportos i aeroplanes ke puedran servir a bombardar abrigos siviles) seran destruidos..

A la baza de esta desizyon kolektiva se topa la inspirasyon del Governo de Sarkozy, lo ke realmente realsa su prestijyo fuertemente deteryorado estos ultimos tyempos. Un djornalisto de la gazeta “Le Nouvel Observateur”, hebdomadaryo sosyalisto kaji syempre kontraryo a la politika del governo aktual, tuvo la sinseridad de eskrivir:

“Esta noche, la Fransya topo de muevo su prestijyo diplomatiko. Ansi ke lo deklaro Hubert Vedrine(ex ministro de relasyones eksteryores del Governo sosyalisto de François Miterand)Es eya ke propozo la rezolusyon historika de utilizar la fuersa kontra las armadas de Kadhafi i ansi es eya ke metyo en ovra la “Responsabilidad de protejar populasyones siviles en peligro”. Es la Fransya ke influenso Obama. Es Alain Juppé “aktual Minitro Fransez de relasyones ekstyeryores” ke prezento esta propozisyon al”Konsilyo de la Seguridad” i ke obtuvo el konsentimyento de la liga Araba. Es a Nicolas Sarkozy,tan solo al empesijo, ke la Fransya deve parsyalmente esta formidavle Viktorya Diplomatika.”

En efekto (komo lo dize esta vez el kotidyano “Le Figaro”) es Nicolas Sarkozy ke sovre la insistensya del filozofo Bernard Henri Levy akselero la intervensyon en favor de una partida de la populasyon Libyana amenazada de muerte por su revolta kontra la tirania.

Los primeros rezultados de las “Fuersas Aliadas” son aktualmente pozitivos …ma por kontra la Liga Araba protesta kontra la muerte malorozamente inevitavle de soldados i bozes diskordantes se azen oir al seno mizmo de la koalisyon.

Ke sera el rezultado final? ke sera la konkluzyon definitiva? En este momento lo mas importante es de no salir de las preskripsyones ke se topan en el teksto de la konstitusyon de la O.N.U.