La semana ultima tuve la okazyon de asistir a dos evenementos kulturales veramente muy reushidos.
El primer era preparado de la parte de una organizasyon de mujeres ke lo djugaron en el Dostluk Yurdu Derneği; un evenemento verdadero ke paso en la sigunda gerra mondial, una enfirmyera kristyana “İrena Sendler” ke puido salvar 2.500 kriyaturas djudiyas de diferentes edades, kon su kapachitad, i buendad, en echandose eya al fuego.
Un grupo de 15 mujeres volontaryas, kon el direktor (yönetmen) Ferit KOHEN; un mansevo de 27 anyos, un joven sempatiko i reushido en su echo; baylando i kantando, djugaron un Dram maraviyozo.
El salon estava yeno, aviya puede ser 200 personas, todos yorando i sin tomar reflo suivando el djugo de las aktrisas, ke mos izyeron bivir (yaşatmak) akel tyempo komo djugadores profesyonales.
Kale apresyar i dar apoyo (desteklemek) a esta organizasyon, para no olvidarmos lo ke pasimos antes sesenta anyos.
Forti Barokas konosida por todos komo una aktrisa ekstraordinarya, kon su rolo en este djugo, estava en el punto el mas alto de su vida teatral.
Felisito a todos ke se okuparon i lavoraron para pueder kitar en medyo este djugo maraviyozo, los ke salyeron a la shena, i los ke dyeron apoyo (destek) sin mostrarsen de detras la shena.
En el 6 Marso, Alhad demanyana kaji 200 personas mos topimos en la eskola djudiya Ulus Musevi Lisesi. Ay kuatro anyos ke se esta realizando en esta eskola; “U-MMUD Mimi Mitrani” Los Seminaryos de Edukasyon (Mimi Mitrani Eğitim Seminerleri).
Un lavoro grande, una organizasyon perfekta, diferentes sujetos, diskusyones kon diferentes envitados, un panel enteresante de las muevas tentativas (girişim) kon los mansevos i mansevas ambisyozos para pueder reushir en sus lavoros.
Un dia yeno de evenementos kulturales, ke ampeso a las onze de la demanyana fina las sinko.
La konversasyon entre İvo Molinas i el presidente de muestra komunitad Sami Herman kon su ministro (vekil) İshak İbrahimzade fue enteresante en el punto de vista de enformasyones sovre “Kualo se esta pasando en muestra Komunitad?”
Un konsultante (danışman) sovre la komunikasyon (iletişim), avlo una ora en los sujetos; kualo es la komunikasyon? Kualo dizimos, kualo se entyende (ne deriz, ne anlaşılır), komo devemeos de eksprimirmos? la lingua del puerpo i las aplikasyones (beden dili ve uygulamalar), kon diferentes egzempyos .
Una mujer de kaji 40 anyos avlo en el sujeto: “El ke puede dirijir su moneda, puede dirijir su Vida”.
Eya muy entelijente, presidente de un holding muy grande en Estambol, disho ke kale pueder avlar enriva de la moneda, kale pueder tomar en konsiderasyon al den frente para pueder dirijar de una manera entelijente la moneda ke poseda la persona.
Su punta de vista es ke; el sujeto de moneda no deve de ser sekreto, guadrado (saklı), al kontraryo saver azer el budjeto (bütçe) para gastar mas poko, saver arekojer la moneda i metodas de investir (yatırım metodları).
Los partisipantes enteresados demandaron demandas i tomaron las repuestas.
Un otro disho: “Todos tyenen 24 oras iguales. (eşit). La manera de utilizar (kullanmak) el tyempo presyozo es el punto emportante ke aparta a las personas reushidas i no reushidas. Kale tener un buto para pueder reushir, en determinando las prioritades (öncelikleri belirlemek). Topar tyempo para todo es una kalitad”.
Munchas otras diskusyones enteresantes ke no aviya mas tyempo de partisipar,
A la nochada uvo un filmo “Brothers”, yeno de mesajes, muy byen djugado.
La istorya de dos ermanos; el uno muy relijyozo, el otro muy laik, la manera de sus vidas, sus diskusyones, i sus dezakordos (anlaşmazlık).
El salon de la eskola yena komo el guevo, todos konosidos. Estava koza de ver!...
Estas okazyones son emportantes para reunisarmos kon munchos de los myembros de muestra komunitad, ke no mos manke, i seremos syempre aunados.
