Dias de dolyo, dias de drama kosmiko

Klara PERAHYA Judeo-Espanyol
16 Mart 2011 Çarşamba

“Homo homini lupus” (el ombre es un lovo para el ombre) avia dicho el poeta latino Plautus, puede ser ke es verdad, ma devemos tambyen adjuntar ke “en momentos de desmamparo, el ombre es igualmente el solo verdadero refujyo para el ombre’’

Delantre el dezastre ke se abatyo sovre el Japon, la palavra keda muda, inkapable de ekspresar la horor de la situasyon. Solo el silensyo puede definir la verdadera dimensyon del drama ke se produzyo en este payis komo tambyen la intensidad doloroza del espanto de lo ke “el’’ puedra ser en el futuro.

Ay momentos ande el ser humano (kuala sea su fuersa o su enerjia) se syente inkapable de metrizar solo un destino entregado a las fuersas imprevizivles de la fatalidad i es solo la mano tendida de un amigo ke puede realmente ayudar.

Aeroplanes yenos de ekipos de medikos i de asistansya sosyal de todo modo de djenero fueron mandados por los Estados Unidos, la Ostralia, la Evropa, partikularmente la Fransya, la Mueva Zelanda, Israel i tambyen varyos otros payizes, kada uno a la mezura de su poder.

 Oy en dia el payis es syempre enfrentando a la amplor de las replikas sismikas ke se produzen i se van ainda inevitavlemente produzir por un largo tyempo... Mas grave, dos o tres de sus Sentrales Nuklear sufrieron danyos relativamente graves.

Ke seran las konsekuensas por el payis el mizmo, i tambyen por su entorno immedyato i mizmo leshano?

Ansi, aktualmente, en desparte del kudyo humanitaryo tan menesterozo para la supervivensya del puevlo, la atensyon parese tambyen infokarse de mas a mas sovre el reziko atomiko…

En la televizyon Franseza kuestyones fueron formuladas, demandando si ay un risko para el entorno. El direktor de la Sentral Nuklear no puda responder de una manera kategorika... “depende de la violensa i de la direksyon de los ayres’’ fue su repuesta...

El Japon es uno de los payizes ke se topan en el punto kulminante de la teknika syentifika, el estuvo kontinualmente en estado de prekosyon absoluta, pronto a resivir semblables katakllzmos, ma esta vez el teremoto fue de una manyitud de 8.9, fenomena mas ke raro en la historya, imprevizivle en su fuersa de destruksyon, i sovre todo el dezastre fue intesifikado por el terrivle sunami ke derroko todo sovre su pasaje.

Ke sera el futuro de este payis? Ke puedra ser (despues una semejante trajedia) su potensyal de enerjia moral i de voluntad de engancharse a la vida?

No ay dubyo ke el ayudo del Mundo Oksidental kontinuara a ser enorme i esto va servir al Japon de mamparo kontra la dezesperansa absoluta, Ma en este momento, este mizmo mundo Oksidental se topa el mizmo, frente kon frente kon el mizmo espanto de un risko semejante.