Eske el puevo fransez ke es uno de los prinsipales promotores del laisizmo i de la fraternidad entre sus varyos sitizanos, todos iguales delantre el kodigo sosyo-etiko de la konstitusyon del payis, esta aktualmente pronto a akseptar un kandidato djudyo a la prezidensya de su territoryo?
Christian Jacob, prezidente de los deputados del partido governomental aktualmente en funksyon, disho konsernando la probable nominasyon de “Dominique Strauss-Kahn” komo kandidato del partido sosyalisto a la eleksyon de 2012, ke ‘el’ no es un ombre del territoryo (un homme du terroire) lo le sinyifika ‘un ombre de la Fransya rural, de los kazales agrikoles’
Eske esta remarka yeva en eya una simple trasa de ezitasyon delantre la probabilidad de ver a la kavesa de la Republika Franseza un prezidente mas konsernado por las grandes kestyones internasyonales ke por los problemas de kada dia del puevlo medyano? o byen eske esta chika fraze kontyene una otra sinyifikasyon?
Dominique Strauss-Kahn es ijo de una madre i de un padre todos los dos djudyos. Este punto no hue nunka mensyonado en kualkyer lugar o eskrita …komo ya fue dicho,la Fransya es un payis ke no tolera en ningun kavzo la mas chika derogasyon al respekto absoluto del laisizmo.
Segun lo ke topi en el WEB, Dominique Strauss Kahn es muy konsernado por los problemas de Israel, el tyene dicho:
(traduzido del Inglez) “konsidero ke todos los djudyos en la Diaspora deven apoyar Israel …. en mi vida de kada dia, me esforso de traer modestamente mi pyedra a la konstruksyon del Estado Israelyano….
Meldi igualmente ke: DSK komo lo nombran abitualmente, tyene un ancho pasado de aktivizmo pro Israel. En 1981, despues la eleksyon de François Mitterand komo prezidente de la Republika Franseza, el kreo aryento mizmo del partido sosyalisto un chiko serklo nombrado “Socialisme et judaisme” afin de azer konoser el punto de vista djudyo konsernando varyos sujetos.
En 1987 DSK dirijo una delegasyon del Partido Sosyalisto Fransez ke vijito Yerushalayim, la sivdad ke el konsidera komo la kapitala del Estado Djudyo, en 1991 el tomo parte a la delegasyon de solidaridad a Israel organizada por el CRİF (konsilyo reprezentativo de las Institusyones djudias de Fransya).
Entre sus ultimos aktos de apoyo a Israel, se puede mensyonar su partisipasyon verbal (endjunto kon Elie Wiesel i otros konferansyeres) en el meeting annual del Jewish Committe ke tuvo lugar ente 29 Abril i 3 Mayo 2008. I poko despues, kuando Israel selebro sus 60 anyos de egzistensya, el fue uno de los dinyitaryos ke fueron kombidados”.
Aktualmente, Dominique Strauss Kahn es el Prezidente de la IMF, i el dirije de una manera briyante, kon una ekuidad absoluta, esta enorme Institusyon Mundyal de la kuala depende el destino de munchos puevlos amenazados por la ambrera. En mizmo tyempo, si se desida a partisipar, el sera probablemente el kandidato eskojido por el Partido sosyalisto a la eleksyon Prezidensyal Franseza de 2012.
Por el momento, el refuza de responder a esta kestyon i esto sera ansi todo el tyempo ke el yevara el titolo de “direktor de la İMF”. Por kontra su mujer deklaro ke eya no dezea ke (a la eskaensa del aktual mandato) su marido asume un muevo periodo de jestyon de la Grande Institusyon mundyal.
Ansi. la mizma kestyon revyene a muestro esprito, rekurente i obsesyonal: “Eske el puevlo Fransez (ke durante siglos, asta una epoka relativamente resyente, konosyo a syertos momentos chikas o grandes tentasyones de antisemitizmo) va tener el mizmo koraje siviko kel Puevlo Amerikano tuvo en akseptando a su kavesa un prezidente de kuero bruno?
Es ke DSK, kon su intelijensya superyor l su sagasidad eksepsyonal, puedra venser el vyejo prejuisyo ke ainda probablemente no muryo enteramente?
