La syensya devino muy huerte, para ke se pueda permeter de no ser vertuoza (segun una palavra del biolojisto Jean Rostand)
Ay serka 70 anyos ke Jean Rostand, biolojisto Fransez, ijo del afamado dramaturjo Edmond Rostand, pronunsyo aproksimativamente estas palavras, i dia despues de dia mos apersivimos ke munchas realizasyones syentifikas ke al empesijo paresyeron ser las deskuvyertas mirakulozas de todos los tyempos, se revelan envezes kon sus dos kompozantes “la pozitiva” i tambyen “ la negativa”.
Si no me yerro, el grande eskritor Israelyano Amos Oz avia desvelopado este tema de ambivalensya ke me avia muncho impresyonado i al kual no me puedo detener de revenir kon grande frekuensa.
Espesyalmente en muestra epoka de mundyalizasyon, ande kon los medyos de lokomosyon kada dia mas performantes i rapidos, el mundo se izo komo un enorme kazal povlado de una umanidad eterojena ke eya no troko, ombres i mujeres ke pensan de una manera enteramente diferente i kreen a valores sin niguna semejansa entre eyas, kada muevo fakto parese tener dos fachas i dos sinyifikasyones munchas vezes kontraryas.
Es por egzempyo el kavzo de “Wikileaks” ke rebolteo en unas kuantas oras el esprito de varyas personas, partikularmente de munchos grandes dirijentes del mundo...
Ke sea en la prensa komo tambyen en los grupos de simples sitizanos ke diskuten entre eyos, las opinyones a este sujeto paresen ser diferentes, segun el punto de vista ande se topan plasados los lokutores ... algunos frankamenta kontraryos a kualyer intruzyon ((davetsiz yere girme) en dosyes sekretos, markados “abolutamente konfidensyal”, pensando ke esto puedra okazyonar malentendidos politikos muy graves... otros, partizanos de una transparensa absoluta ke asegurara un ovligo de derechedad en las tranzaksyones nasyonales i internasyonales.
Si, irrefutavlement, la kuesta de transparensya es en eya mizma una valor sosyal inkontestavle. En su esensya mizma eya sinyifika klaredad i yeva en su seno los premisyos de un mundo mas djusto ....Eya es por seguro benefika, sovre todo kuando se mete al servisyo de la lucha kontra la indjustisya i los abuzos de ke djenero de sean.
Ma... en munchas otras surkanstansyas, esta “kuesta de la verdad” troka en un djenero de kontrol kontinuo sovre kada djesto o kada palavra ke pronunsya la persona, un djenero de absensya del derecho a la libertad absoluta de ekspresyon, la kuala konstitue la esensya mizma de la demokrasia.
En su enkaminamyento verso el objetivo syempre mobile al kual las sirkunstansyas lo pushan, kada individuo tyene munchas vezes momentos de ezitasyon, i mizmo de erransya (başıboşluk), ke lo ovligan a trokar de kamino...Entonses “una intruzyon en este espasyo ekskluzivamente personal” no es un akto de klaredad ma de visyo de indiskredyon, un djenero de “voyeurizmo” (dikizcilik) komo lo dize el filozofo Luc Ferry.
Desde un syerto tyempo, es ansi de munchos faktos ke yevan en eyos dos sinyifikasyones diferentes, kreando ansi una perpleksidad kaji perpetual ke mos mete sovre un terreno kontinualmente instavle ..
Por kuala solusyon optar? “Mirar, oir i kayar” dizeran munchas personas. A primera vista esto parese ser una prova de grande sezo i madurez. Ma en muestra kualidad de kriansas pensantes, es ke tenemos el derecho de kedar sin reaksyon i de no formular kestyones, mizmo si savemos ke eyas no tendran nunka una repuesta realmente kreivle?