Ermozo djesto de solidaridad humana, espesyalmente de la parte de la Turkia ansi ke de varyos payizes vezinos Arabos
Estos ultimos dias, desde djueves pasado, kilometros i kilometros de sharas desparesyeron en las flamas giganteskas sovre el monte Karmel, uno de los lugares los mas apresyados de Israel.
41 personas por la mas parte mansevos pyedreron la vida, entre los kualos un adolesente de 16 anyos, voluntaryo para ayudar a luchar kontra el insendyo.
Shabat el huego empeso enfin a ser sino enteramente dominado ma a lo menos tomado debasho kontrol por luchadores korajozos , los kualos (al peligro de sus propya vida) no sesaron un solo minuto de kombatir afin de limitarlo... i enfin alhad la tadre, despues de 77 oras de esforsos de la parte de una chika armada de profesyonales i voluntaryos, las radyos i televizyones anunsyaron ke el huego fue enteramente dominado.
El ayudo internasyonal fue enorme, empesando de los payizes los mas serkanos: La Turkia, el Ayifto, la Jordania, la Palestina, la Gresya, Bulgaria, Fransa, Italya, Espanya, Estados Unides... todos partisiparon al terrivle kombate kontra las flamas i la muerte.
Asta este momento, no se pudo topar egzaktamente la kavza de este drama ...se avlo de una famiya ke fue piknikar debasho los arvoles i ke se olvido de amatar el chiko huego ke avia asendido para azer buyir la agua del “kave” o del “chay”.... de dos ermanos de orijen druz, dos adolesentes de 14 i 15 anyos ke fueron sospechados de intisyones kriminales , arrestados para un primer interogatoryo ke no dyo ningun rezultado probante, i ke fueron kaji immedyatamente liberados.
Por seguro ke “las kondisyones atmosferikas” i “el fakto kel payis manka desde un largo tyempo de luvya” jugaron un grande rolo en la amplifikasyon del huego , ma lo ke es partikularmente dolorozo es ke Israel el mizmo no estava pronto a enfrentar semejante dezastre.
El kavzo es mas ke sorprendente; es difisil de imajinar ke este payis (syempre tan akavidozo i avyerto a todo lo ke konserna su seguridad) pudo toparse en estado de imposivilidad de luchar de una manera efisyente kontra un insendyo kual ke fuera su dimensyon ... Malorozamente ansi hue el kavzo i es grasyas al ayudo de nombrozos otros payizes, kel dezastre pudo ser realamente dominado.
Benyamin Natanyahu lo deklaro el mizmo de su propya boka i agradesyo kalorozamente todos los ke en esta situasyon trajika, no ezitaron a akudir para venser el huego voras en su kruel lavoro de destruksyon.
Kuarenta i una viktimas, 41 kazas en dolyo i un puevlo tromatizado por un dezastre delantre el kual se sintyo inkapavle de luchar solo...ma tambyen , kuala ke sea su dolor, el sentimyento empapado de tristesa de realizar ke no kedo solo, sin ayudo, en los momentos difisiles kel payis bivyo.
