Si, las 25 viktimas de los 2 terrivles asaltos terroristos del 15 Novembre 2003 kontra las Sinagogas “ NEVEŞALOM” de Şişhane i “BETH ISRAEL” de Şişli fueron komemoradas kon orasyones i diskorsos muy emosyonantes ansi ke kon klavinas koloradas.
La seremonia fue organizada por la Munisipalidad de Şişli, en la data mizma del kalendaryo Turko sivil kontemporeano i empeso kon la avla muy sinyifikante echa por Rav Yeuda Adoni, Vice Gran Rabino de muestro payis, el kual mos izo akodrar ke muryeron en este drama no solo yahidim djudyos en estado de orasyon ma tambyen botikaryos de kualkyer otra relijyon ke se dirijian verso el lugar de sus lavoro i tambyen simple pasantes ke tuvyeron el desmazal de toparsen aya en este momento de grande perikolo, lo ke prova una vez mas kel terrorizmo es una fuersa syega ke no destruye solo el objetivo apuntado ma tambyen todo lo ke se topa sovre su pasaje.
A la sigida de Rav Yeuda Adoni, el Prezidente de la Munisipalidad de Beyoğlu “Ahmet Misbah Demircan” empeso su avla en afirmanda kel 15 Novembre 2003 fue un dia muy oskuro para la Turkia i ke nunka se dezataran los lazos de karinyo (şefkat bağları) ke mos unisan los unos a los otros. El tuvo estas ermozas palavras: “No vamos nunka abokar la kavesa delantre los objetivos de la terror”.
De su parte, el Prezidente de la Minisipalidad de Şişli “Mustafa Sarıgül” despues de aver maldicho el terrorizmo, pronunsyo estas esmovyentes palavras: el 15 Novembre 2OO3 una manyana de Shabat, una horrivle trampa fue tendida a personas inosentes en el egzersizyo de sus dever relijyozo. Nada puede deskulpar esta koza inyovle ke es el terrorizmo.En muestro payis las diferensyas de relijyon, de kreensa o de lengua no van nunka prejudisyar el esprito de unyon i de amistad ke se topa entre los sitizanos.
La Seremonia tomo fin kon las Orasyones del Müftü de Şişli i de Rav Adoni, i klavinas koloradas fueron distribuidas a la memorya de las viktimas.
